ქართული ტრადიციული ყველი ევროპულ ბაზარზე ახალ ფორმატში წარდგება. Izy-ის სუბლიმირებული შებოლილი სულგუნის ხემსები უკვე ავსტრიის დედაქალაქ ვენაშია და ადგილობრივ ბაზართან ერთად, ვენის საშობაო ბაზრობაზეც იქნება წარმოდგენილი. ექსპორტის დეტალებზე, პროდუქტის შექმნის კონცეფციასა და კომპანიის განვითარების გეგმებზე Business Insider Georgia-ს Izy-ის დირექტორი ანა შაქარაშვილი ესაუბრა.

„ქართული ტრადიციული სუფრის ერთ-ერთი გამორჩეული პროდუქტი - შებოლილი სულგუნი ევროპულ ბაზარზე ახალ ფორმატში წარდგება. ჩვენი სუბლიმირებული შებოლილი სულგუნის ხემსები უკვე ავსტრიის დედაქალაქ ვენაშია. ეს კი მხოლოდ დასაწყისია.

პროდუქცია ავსტრიის ბაზარზე შევა და ვენის საშობაო ბაზრობაზეც იქნება წარმოდგენილი. ეს სივრცე ევროპის სხვადასხვა კუთხიდან ჩამოსულ ადამიანებს აერთიანებს, რომლებიც ერთმანეთს საკუთარ კულტურას, ტრადიციებსა და გასტრონომიულ გამოცდილებას უზიარებენ. წელს ევროპელ მომხმარებელს შესაძლებლობა ექნება, ქართული ყველი განსხვავებული ფორმით გაიცნოს და თანამედროვე ტექნოლოგიით დამუშავებული შებოლილი სულგუნის ხემსები დააგემოვნოს.

ვენის საშობაო ბაზრობაზე მონაწილეობა ჩვენთვის მნიშვნელოვანი შესაძლებლობაა, ქართული გასტრონომიული ტრადიცია საერთაშორისო აუდიტორიას გავაცნოთ და წარმოვაჩინოთ, როგორ შეიძლება ტრადიციული პროდუქტის თანამედროვე ტექნოლოგიით გარდაქმნა და ახალი ფორმით შეთავაზება.

ექსპორტი ქართველი პარტნიორის ჩართულობით განხორციელდა. ეს თანამშრომლობა კიდევ ერთხელ აჩვენებს, რამდენად მნიშვნელოვანია საერთაშორისო ბაზრებზე გასვლისას პარტნიორობა, ინიციატივა და განვითარების საერთო ხედვა. მიგვაჩნია, რომ ეს მნიშვნელოვანი ნაბიჯია ქართული პროდუქტის ევროკავშირის ბაზარზე დამკვიდრების მიმართულებით.

ჩვენ საუკუნოვანი ქართული გასტრონომიული ტრადიცია თანამედროვე სუბლიმაციის ტექნოლოგიას შევუხამეთ და შევქმენით პროდუქტი, რომელიც საქართველოს ფარგლებს სცდება. ეს მხოლოდ ჩვენი კომპანიის წარმატება არ არის - გვიხარია, რომ ქართული პროდუქტის საერთაშორისო ცნობადობის ზრდაშიც შეგვაქვს წვლილი.

Izy-ის პროდუქცია უკვე წარმოდგენილია აშშ-ისა და კანადის ბაზრებზე, ასევე ხელმისაწვდომია Amazon-ის პლატფორმაზე. ვენაში შესვლა კი საერთაშორისო განვითარების კიდევ ერთი ეტაპია. ჩვენი სურვილია, ეს პროცესი გაგრძელდეს და ქართული გემო სულ უფრო მეტ ქვეყანაში გავიტანოთ.

ჩვენ განვითარებას ვაგრძელებთ და ვცდილობთ, Izy-ის პროდუქტმა მსოფლიო ბაზარზე საკუთარი ადგილი დაიმკვიდროს. გვჯერა, რომ ქართული გემო საერთაშორისო მომხმარებლისთვის საინტერესო აღმოჩენა იქნება და ჩვენი პროდუქცია მსოფლიოს სხვადასხვა ქვეყანაში ღირსეულად წარდგება“, - აცხადებს ანა შაქარაშვილი.