2017 წელს, როდესაც საქართველოში კრიპტოვალუტების შესახებ ქართულენოვანი ინფორმაცია თითქმის არ არსებობდა, წალენჯიხელმა ძმებმა - გიორგი და შალვა ქობალიებმა - ახალი იდეის განხორციელება დაიწყეს.

ტექნოლოგიებთან მუშაობის გამოცდილება მათ უკვე ჰქონდათ - 2007 წლიდან ვებგვერდებს ქმნიდნენ, 2010 წლიდან კი სერვერებსა და ტექნიკურ სისტემებზე მუშაობდნენ. 2017 წელს ისინი კრიპტოინდუსტრიითა და მაინინგით დაინტერესდნენ და GPU მაინინგ-ფერმა ააწყვეს. პროცესში საჭირო ინფორმაციის მოძიება და ბევრი რამის დამოუკიდებლად სწავლა უწევდათ.

საჭირო ინფორმაციის ქართულ ენაზე მოძიების სირთულის გამო, გიორგიმ და შალვამ გადაწყვიტეს, მიღებული ცოდნა სხვებისთვისაც გაეზიარებინათ. თავდაპირველად მათ შექმნეს მცირე Facebook-ჯგუფი, სადაც კრიპტოთემებით დაინტერესებულ ადამიანებს ტექნიკური პრობლემების მოგვარებაში ეხმარებოდნენ და საკუთარ გამოცდილებას უზიარებდნენ.

სწორედ ამ რეალობაში გაჩნდა იდეა – შეექმნათ ქართული პლატფორმა, რომელიც ქართველ აუდიტორიას კრიპტოვალუტებისა და ბლოკჩეინის შესახებ ინფორმაციას მშობლიურ ენაზე მიაწვდიდა.

შალვა ქობალია:

„2017 წელს, როდესაც საქართველოში კრიპტოვალუტებზე ქართულ ენაზე ინფორმაცია თითქმის არ არსებობდა, ერთი იდეა გვქონდა - შეგვექმნა სივრცე, რომელიც ადამიანებს ამ ახალ სამყაროსთან დააკავშირებდა.“

ამგვარად, 2017 წელს შეიქმნა CryptoNews.Ge - პირველი ქართული კრიპტომედია. 

გიორგი და შალვა თვითონვე აგროვებდნენ ინფორმაციას საერთაშორისო წყაროებიდან, ამოწმებდნენ, თარგმნიდნენ და ქართულ აუდიტორიას აწვდიდნენ. იმ პერიოდში ეს ქართული მედიისთვის სრულიად ახალი მიმართულება იყო. მათი მთავარი მიზანი იყო, კრიპტოინდუსტრიის შესახებ სანდო და მნიშვნელოვანი ინფორმაცია ქართულ ენაზე ხელმისაწვდომი გაეხადათ.

კრიპტოინდუსტრიის ზრდა და CryptoNews.Ge-ის განვითარება

2017 წლიდან კრიპტოინდუსტრიამ არაერთი მნიშვნელოვანი ეტაპი გაიარა – ბიტკოინის სხვადასხვა საბაზრო ციკლი, ეთერიუმის განვითარება, ICO-ების ეპოქა, DeFi-ისა და NFT-ების გაჩენა, Web3-ის გავრცელება, ინსტიტუციური ინვესტორების გააქტიურება და ბოლო წლებში AI-ისა და ბლოკჩეინის ტექნოლოგიების მზარდი ურთიერთკავშირი.

ამ ცვლილებებთან ერთად გაფართოვდა CryptoNews.Ge-ის თემატიკაც.

დღეს CryptoNews.Ge აშუქებს კრიპტოვალუტების, ბლოკჩეინის, Web3-ის, DeFi-ის, AI-ისა და ციფრული ფინანსების სფეროში მიმდინარე სიახლეებსა და მნიშვნელოვან მოვლენებს.

საქართველოდან საერთაშორისო სცენაზე

CryptoNews.Ge-ის საქმიანობა საქართველოს ფარგლებსაც გასცდა. პლატფორმა საერთაშორისო კრიპტო და Web3 ღონისძიებებს აშუქებს და არაერთ მათგანთან მედიაპარტნიორობის გამოცდილებაც აქვს. მათ შორისაა:

• Bitcoin Conference
• Dutch Blockchain Week
• Web3 Warsaw
• Blockchain Futurist Conference 2026
• UN Blockchain Week 2026
• Consensus Miami 2026
• MEGACAMPUS SUMMIT DUBAI 2026
• და სხვა საერთაშორისო კრიპტო და Web3 ღონისძიებები.

ამ თანამშრომლობებმა და საერთაშორისო ღონისძიებებში მონაწილეობამ CryptoNews.Ge-ს შესაძლებლობა მისცა, უშუალო კავშირები დაემყარებინა გლობალური კრიპტოინდუსტრიისა და Web3-ის წარმომადგენლებთან და საერთაშორისო მოვლენები ადგილიდან გაეშუქებინა.

შალვა ქობალია:

„CryptoNews.Ge მხოლოდ მედია აღარ არის – ის საქართველოსა და გლობალურ კრიპტოინდუსტრიას შორის ერთგვარ ხიდად იქცა. წინ ახალი გამოწვევები და შესაძლებლობებია, ჩვენი მიზანი კი მკაფიოა – გავაძლიეროთ კავშირი საერთაშორისო ბაზართან და საქართველო გლობალურ კრიპტო და Web3 სივრცეში უფრო მეტად წარმოვაჩინოთ.“

2017-დან 2026 წლამდე

2017 წლიდან დღემდე CryptoNews.Ge მნიშვნელოვნად განვითარდა და მისი აუდიტორიაც გაიზარდა. ამ ცვლილებას გიორგი ქობალია ასე აფასებს:

გიორგი ქობალია:

„2017 წელს დაწყებულმა საქმიანობამ 2026 წლისთვის სრულიად განსხვავებულ მასშტაბს მიაღწია. დღეს ვხედავთ, რომ საქართველოში კრიპტოვალუტებისა და Web3-ის მიმართ ინტერესი მნიშვნელოვნად გაიზარდა. გაიზარდა ჩვენი აუდიტორიაც და სულ უფრო მეტი ადამიანი მოგვმართავს, რომელსაც არა მხოლოდ სიახლეების მიღება, არამედ ამ ინდუსტრიის უკეთ გაგებაც სურს. ჩვენთვის ეს იმ გზის ყველაზე მნიშვნელოვანი შედეგია, რომელიც წლების წინ დავიწყეთ.“

დღეს CryptoNews.Ge-ის კონტენტი ვრცელდება Facebook-ზე, Telegram-ზე, Instagram-ზე, TikTok-ზე, LinkedIn-სა და X-ზე, ხოლო მის სოციალურ გვერდებსა და ჯგუფებს ჯამურად 200,000-ზე მეტი გამომწერი და წევრი ჰყავს.

2017 წელს წალენჯიხიდან დაწყებული იდეა წლების განმავლობაში განვითარდა და დღეს CryptoNews.Ge ქართულ აუდიტორიას გლობალურ კრიპტო და Web3 სამყაროსთან აკავშირებს.

გიორგი ქობალიასთვის კი ამ გზას განსაკუთრებული პირადი მნიშვნელობაც აქვს.

გიორგი ქობალია:

„ჩემთვის ეს პლატფორმა მხოლოდ ვებგვერდი არ არის. ის ჩემი შესაძლებლობების, ოცნებების, შრომის, ბრძოლისა და რწმენის გამოხატულებაა.“

CryptoNews.Ge – პირველი ქართული კრიპტომედია.