საკონსულტაციო კომპანია Agritouch ბაზარზე 2018 წლიდან ოპერირებს და ორ ძირითად მიმართულებას აერთიანებს. ამის შესახებ, Business Insider Georgia - ს კომპანიის თანადამფუძნებელმა ეკა ვეფხვაძემ განუცხადა. 

„ჩვენ ვაერთიანებთ ორ ძირითადად მიმართულებას. ერთი არის „ბლუბერი ფარმი“, რომელიც ლურჯი მოცვის წარმოებაა და Agritouch, რომელიც არის საკონსულტაციო, საექსპორტო კომპანია. ჩვენი კომპანიის მეშვეობით ხდება ადგილობრივი ხილის, ბოსტნეულის და სხვა ქართული საკვები და სასმელი პროდუქციის ექსპორტი სხვადასხვა ქვეყნებში და სრული კონსულტაცია, რაც გულისხმობს თუ რა შეფუთვებზეა მოთხოვნა, რა სტანდარტებს უნდა ითვალისწინებდეს კომპანია, ეტიკეტზე რა უნდა იყოს დატანილი, რა დოკუმენტაცია უნდა ახლდეს თან პროდუქციას და ა.შ. ჩვენთან წარმოებული ნებისმიერი სასმელი და საკვები პროდუქტი გადამუშავებული და ასევე ნედლი, Fresh ფორმით როგორ უნდა გახდეს საექსპორტო სახის. ამ მიმართულებით, ჩვენი ძირითადი ბაზარი არის გალფის ქვეყნები, კატარი, დუბაი, საუდის არაბეთი. 

ჩვენი კომპანიის მეორე მიმართულება არის საკონსულტაციო მომსახურება ლურჯი მოცვის გაშენების კუთხით. ვთანამშრომლობთ სხვადასხვა ქართულ ბანკთან, რომლებსაც აქვთ აგრო სესხი. მათ პორტფოლიოს ვუწევთ სრულ მონიტორინგს და ასევე გვაქვს აგრო საკონსულტაციო სერვისები გაშენებიდან დაწყებული Post-harvest ანუ კრეფის შემდგომი მართვის ჩათვლით “, - განმარტავს კომპანიის თანადამფუძნებელი ეკა ვეფხვაძე.

კომპანია დაკომპლექტებულია უცხოელი პროფესიონალი კონსულტანტებით. საკონსულტაციო სერვისების მიმართ ინტერესი და მოთხოვნა საკმაოდ მზარდია. 

„მოთხოვნა პირდაპირ კავშირშია სახელმწიფოს სტიმულაციებთან. მაგალითად, როდესაც არის გრანტები კონკრეტული მიმართულებით, ან სესხები სუბსიდირების კუთხით რა თქმა უნდა ეს დამატებითი სტიმულია ინვესტორისთვის, რომ ინვესტიცია განახორციელოს ამ სფეროში და შესაბამისად ჩვენი მოთხოვნაც იზრდება. ძირითადად, მოთხოვნა მზარდია იმიტომ, რომ ჩვენ ტექნიკური სახის კონსულტაციას ვუწევთ, ან აგრონომიულს და ასევე კრეფის შემდგომ მართვაში ვეხმარებით, რომელიც საკმაოდ სპეციფიკურია და აუცილებლად გამოცდილებას მოითხოვს. ჩვენ გვყავს უცხოელი კონსულტანტები, რომლებიც ძალიან დიდი რეპუტაციით სარგებლობენ არამარტო საქართველოში და ასევე გვყავს ადგილობრივი აგრონომებიც. ჩვენ, გარდა ტექნიკური დახმარებისა გაშენების პროცესში ჩართვასაც ვუზრუნველყოფთ “, - ამბობს კომპანიის თანადამფუძნებელი ეკა ვეფხვაძე.

კომპანია მცირე ფერმერებთან აქტიურად თანამშრომლობს და ეხმარება მათ საკუთარი პროდუქციის რეალიზაციაში.

"ჩვენ ასევე გვაქვს სამაცივრე მეურნეობა, რომელიც განკუთვნილია მცირე ფერმერებისთვის, ვისაც არ აქვს ინფრასტრუქტურა და დამოუკიდებლად ვერ ახერხებენ პროდუქციის რეალიზებას. ვიბარებთ მათ პროდუქტს, ამ შემთხვევაში ლურჯ მოცვს გურიაში და ახლომახლო რეგიონში. შემდეგ ვახორციელებთ დახარისხებას, დაფასოებას, საექსპორტო სახის მიცემას და ვაგზავნით სხვადასხვა ქვეყნის ბაზარზე “, - აღნიშნავს კომპანიის თანადამფუძნებელი ეკა ვეფხვაძე.