სათამაშოების მაღაზიათა ქსელ „ჭიტას“ გაფართოების სტრატეგია ქვეყნის მასშტაბით ბრენდის ხელმისაწვდომობის გაზრდასა და ახალი ქალაქების ათვისებას ეფუძნება. რამდენიმე დღეში „ჭიტა“ რიგით მე-19 ფილიალს ბათუმში გახსნის, რაც ბრენდის ხელმისაწვდომობას კიდევ უფრო გაზრდის. კომპანია მუდმივად აძლიერებს მომსახურების ხარისხს, ონლაინ გაყიდვებს და პარტნიორობას ადგილობრივ და საერთაშორისო ბრენდებთან. უფრო დეტალურად „ჭიტას“ გეგმებზე და სტრატეგიებზე Business Insider Georgia-სთან კომპანიის მარკეტინგის ხელმძღვანელი, ნია ტყეშელაშვილი საუბრობს. 

როგორია „ჭიტას“ მიმდინარე გაფართოების სტრატეგია და რომელ ქალაქებში იგეგმება ახალი ფილიალების გახსნა? რამდენ ფილიალს ფლობს ქსელი?

„ჭიტას“ გაფართოების სტრატეგია ქვეყნის მასშტაბით ეტაპობრივ და მიზანმიმართულ გეგმას ეფუძნება. ჩვენი მთავარი ამოცანაა ბრენდის ხელმისაწვდომობის გაზრდა და სხვადასხვა ქალაქების ათვისება.

სწორედ ამ სტრატეგიის ფარგლებში „ჭიტა“ ახალ ფილიალს ბათუმში ხსნის. ოფიციალური გახსნა 21 თებერვალს შედგება. ეს იქნება „ჭიტას“ რიგით მე-19 ფილიალი. ბათუმი შევარჩიეთ იმიტომ, რომ ქალაქი სწრაფად ვითარდება, ოჯახური სეგმენტი აქტიურად იზრდება და სწორედ ამიტომ ფილიალის გახსნა ჩვენთვის სტრატეგიულად გააზრებული ნაბიჯია.

2026 წლის განმავლობაში კიდევ ვგეგმავთ გაფართოებას, როგორც დიდ ქალაქებში, ასევე სხვა პერსპექტიულ რეგიონულ ცენტრებში. ჩვენი მიზანია, პატარებისთვის და მათი მშობლებისთვის შევქმნათ კომფორტული და სასიამოვნო გარემო.

რა კრიტერიუმებით არჩევთ მაღაზიების ახალ ადგილმდებარეობებს?

ახალი ფილიალის ლოკაციის შერჩევისას ვხელმძღვანელობთ რამდენიმე ძირითად კრიტერიუმით:

• დემოგრაფიული მონაცემები

• კონკურენტული გარემოს ანალიზი

• საცხოვრებელი უბნების განვითარების დინამიკა

ჩვენთვის მნიშვნელოვანია, რომ მომხმარებლებისთვის „ჭიტა“ იყოს ყოველდღიური ცხოვრების ნაწილი — მარტივად მისადგომი, კომფორტული და უსაფრთხო სივრცე.

გეგმავთ თუ არა მომსახურების ხარისხის გაუმჯობესებას ან პროდუქციის პორტფელის გაფართოებას?

„ჭიტაში“ მომსახურების ხარისხი ერთ-ერთი მთავარი ღირებულებაა. ჩვენ მუდმივად ვმუშაობთ გუნდის განვითარებაზე, მომხმარებლის გამოცდილების გაუმჯობესებასა და სტანდარტების დახვეწაზე.

რაც შეეხება პროდუქციის ასორტიმენტის გაფართოებას, ამ საკითხზე მუდმივად ვმუშაობთ, რათა მომხმარებელს შევთავაზოთ საუკეთესო პროდუქცია. ვაკვირდებით ტენდენციებს, რათა დროულად დავამატოთ ინოვაციური და მოთხოვნადი პროდუქცია.

როგორ აფასებთ ონლაინ გაყიდვების როლს „ჭიტას“ ბიზნესმოდელში?

ონლაინ გაყიდვები ჩვენთვის სტრატეგიული მიმართულებაა. დამეთანხმებით, რომ თანამედროვე მომხმარებლისთვის კომფორტი და სწრაფი ხელმისაწვდომობა პრიორიტეტულია, ამიტომ ელექტრონული კომერციის განვითარებას აქტიურად ვავითარებთ.

ვმუშაობთ პლატფორმის გაუმჯობესებაზე, მიწოდების სერვისის ოპტიმიზაციაზე და ციფრული მარკეტინგის გაძლიერებაზე. ჩვენი მიზანია, ონლაინ გაყიდვები მაქსიმალურად კომფორტული იყოს მომხმარებლისთვის, ამისთვის ძალისხმევას არ ვიშურებთ.

როგორია თქვენი პარტნიორული ურთიერთობა ადგილობრივ მომწოდებლებთან?

ადგილობრივ მწარმოებლებთან თანამშრომლობა ჩვენთვის მნიშვნელოვანია, როგორც ბიზნესის, ისე სოციალური პასუხისმგებლობის კუთხით. ვცდილობთ, რომ ჩვენი ასორტიმენტის გარკვეულ ნაწილში წარმოდგენილი იყოს ქართული ბრენდები, რომლებიც აკმაყოფილებენ ხარისხისა და უსაფრთხოების სტანდარტებს.

ადგილობრივი კომპანიების ინტერესი საკმაოდ მაღალია, და ჩვენ ღია ვართ თანამშრომლობისთვის, თუ პროდუქტი შეესაბამება „ჭიტას“ სტანდარტებსა და ბრენდის კონცეფციას.

გეგმავთ თუ არა მსოფლიო ბრენდთან ექსკლუზიურ თანამშრომლობას?

რა თქმა უნდა, ჩვენ მუდმივად ვაწარმოებთ მოლაპარაკებებს საერთაშორისო ბრენდებთან, რათა მოვიპოვოთ ექსკლუზიური თანამშრომლობა.

„ჭიტას“ სტრატეგიაა მომხმარებელს შევთავაზოთ ისეთი პროდუქცია, რომელიც გამოირჩევა ხარისხით, უსაფრთხოებითა და ექსკლუზიურობით.