Chelti Winery / მეღვინეობა ჩელთი საექსპორტო არეალის გაფართოებას განაგრძობს. როგორც Business Insider Georgia-სთან „ჩელთის“ კომერციული დირექტორი, ანა მირიანაშვილი აცხადებს, რამდენიმე დღეში ახალი კონტაქტების გაფორმება იგეგმება ინგლისშიც, რის ხარჯზე ინგლისში „ჩელთის“ გაყიდვები კიდევ უფრო გაიზრდება.

„სულ ახლახან ვიყავით London Fashion Week-ის მხარდამჭერები, სადაც გვქონდა კოლაბორაცია ბევრ ცნობილ ადამიანთან. ჩემთვის ცნობილი ინფორმაციით, აქამდე სხვა ქართული ღვინო არ ყოფილა London Fashion Week-ის ოფიციალური მხარდამჭერი. ახლა ლონდონში ჩავდივარ იმ მიზნით, რომ გავაფორმოთ ახალი ხელშეკრულებები და გავაფართოოთ არეალი. საკმაოდ ბევრი ადამიანი გავიცანით მოდის ინდუსტრიიდანაც და ზოგადად სხვადასხვა ივენთების ორგანიზატორიც. ბოლო პერიოდში ლონდონში თანდათან ვფართოვდებით - უფრო მეტ რესტორანში და ქსელში შევედით,“ - განმარტავს „ჩელთის“ კომერციული დირექტორი.

ანა მირიანაშვილის თქმით, წელს ინგლისში „ჩელთის“ გაყიდვები 25%-იან ზრდას აჩვენებს.

„მოლოდინი გვაქვს, რომ ამ ბაზარზე ბევრად უფრო მაღალ მაჩვენებლებზე გავიდეთ და უფრო მეტი ზრდა გვექნება,“ - აცხადებს მეღვინეობის ერთ-ერთი მენეჯერი.

კომპანიის 2026 წლის ძირითად გეგმებში აშშ-სა და ჩინეთის ბაზრებზე გაფართოება შედის.

„2026 წელსაც აქტიურად ვაპირებთ გამოფენებში მონაწილეობას. ასევე ძალიან ბევრი ღონისძიება გვაქვს, როგორც საქართველოში, ისე საექსპორტო ქვეყნებში. 2026 წელს ამერიკაში გაყიდვების გაფართოებაზე ვმუშაობთ. აშშ და ჩინეთი გვყავს აღებული სტრატეგიულ მიმართულებად. ჩინეთში 2025 წელს გავაკეთეთ საკუთარი საწყობი. თუ აქამდე საწყობი გვქონდა მხოლოდ გერმანიაში, ახლა უკვე გვაქვს ჩინეთშიც,“ - ამბობს ანა მირიანაშვილი.

გერმანიისა და ჩინეთის შემდეგ „ჩელთი“ საწყობების გაკეთებას განიხილავს აზიის ერთ-ერთ ქვეყანაშიც.

„ჩინეთიდან ექსპორტი არ ხდება სხვა აზიურ ქვეყნებში, ამიტომ თუ სადმე აზიაში დაემატება საწყობი, მაგალითად, ჰონგ კონგში - ის გახდება აზიაში რეექსპორტის პუნქტიც. თუმცა ეს ჯერ იდეის დონეზე გვაქვს.

ევროპაში კი პატარ-პატარა საწყობების გაკეთება უკვე დავიწყეთ. თუ არის გარკვეული ადგილები, სადაც გერმანიიდან მიწოდება ფერხდება, ახლა უკვე პატარა პუნქტი გვაქვს. შვეიცარიაში განვაახლეთ მიწოდება, ახალი იმპორტიორი გვყავს და ახალი პარტნიორები გავიჩინეთ,“ - ამბობს „ჩელთის“ კომერციული დირექტორი.

აღსანიშნავია, რომ „ჩელთის“ პროდუქცია უცხოურ ბაზრებზე საკმაოდ მოთხოვნადია.

„ჩვენი ღვინოები მოთხოვნადია როგორც ევროპაში, ისე აზიაში და ასევე ამერიკაში. ამ ფონზე გარკვეულ ბაზრებზე გვსურს გაზრდა,“ - აცხადებს „ჩელთის“ კომერციული დირექტორი.