ჩვენი მიზანია, ბიზნესებს წარმოების ზრდასა და უფრო კონკურენტუნარიანი პროდუქციის შექმნაში დავეხმაროთ, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას თბილისის მერიის ეკონომიკური განვითარების საქალაქო სამსახურის უფროსმა, ვახტანგ ლომჯარიამ განაცხადა. 

„მეორე ფაზა უკვე დასკვნით ეტაპზეა, ფაქტობრივად. ჩვენ უკვე გვყავს 80-მდე ბენეფიციარი. ნაწილმა უკვე მიიღო თანხა, ნაწილი მიიღებს ამ თანხას, ხოლო იმ კომპანიების 19 კომპანიის შემთხვევაში, რომლებიც შარშანაც დაფინანსდნენ, გასულ წელს მიღებული დაფინანსების შედეგები გვინდა ვნახოთ ნოემბრამდე. ნოემბერში კი უკვე მათი ბედი გადაწყდება რამდენად მიიღებენ კიდევ ერთხელ დაფინანსებას. ჩვენ არ ვართ წინააღმდეგი, ბიზნესმა რამდენიმე დაფინანსება მიიღოს, თუმცა გვინდა, შედეგი ვნახოთ და ძალიან სერიოზულად ვუდგებით ამ პროგრამას.

ჩვენთვის მნიშვნელოვანია დამატებული ღირებულების შექმნა, პროდუქციის შემდგომი დამუშავება. ამ პროცესში იქმნება როგორც დასაქმება, ასევე დამატებითი სარგებელი და პროდუქტი, რაც, ვფიქრობთ, მნიშვნელოვანია ადგილობრივი ეკონომიკის განვითარებისთვის. ძალიან გვინდა, რომ ამას ხელი შევუწყოთ.
ჩვენი მიზანია, ბიზნესებს დავეხმაროთ როგორც წარმოების რაოდენობის ზრდაში, ასევე წარმოებული პროდუქციის ხარისხის გაუმჯობესებასა და უფრო კონკურენტუნარიანი პროდუქციის შექმნაში, ან ორივეში ერთად. არის დანადგარები, რომლებიც ბიზნესს ეხმარება, რომ მეტი პროდუქცია და უკეთესი ხარისხი უზრუნველყოს. სწორედ ამ მიმართულებით მივისწრაფვით პატარა ბიზნესებს ამ კუთხით დავეხმაროთ.

ერთი სიახლეც გვაქვს, ბარემ დავაანონსოთ: შემდეგ კვირაში ამას თბილისის მთავრობაზეც გამოვაცხადებთ. თუკი აქამდე საუბარი გვქონდა ნახევარ მილიონიან ბრუნვაზე, გადაწყვეტილება მიღებულია, რომ წელსვე დაინერგოს ჩვენი დახმარების შესაძლებლობა მილიონამდე ბრუნვის შემთხვევაშიც. ასე რომ, უფრო დიდ ბიზნესებსაც შეეძლებათ ამ დაფინანსებასთან, ამ სუბსიდიასთან დაკავშირებით განაცხადის გაკეთება“, - აცხადებს ვახტანგ ლომჯარია.