ღვინის კომპანია „ბოსტოღანა“, რომლის ისტორიაც 2021 წლიდან იწყება, ევროპის ბაზარზე ექსპორტისთვის ემზადება. ამის შესახებ, Business Insider Georgia-ს კომპანიის მარკეტინგის მენეჯერმა ნინი ბაშარულმა განუცხადა.  

„მნიშვნელოვანი და საინტერესო წელი გვაქვს, პირველად გავდივართ ევროპის ბაზარზე. ჯერ იყო ბერლინი, ახლა კი რომი. „ბოსტოღანა“ ბაზარზე სულ ოთხი წელია არსებობს, ბოლო ერთი წლის განმავლობაში კი აქტიურად ვმუშაობთ ბრენდის განვითარებასა და საექსპორტო პოტენციალის გაძლიერებაზე. ჩვვენთვის ძალიან სასიამოვნოა, ის რომ შესაძლებლობა გვაქვს უცხოელ მომხმარებლებსაც წარვუდგინოთ ჩვენი უღალატო, ქიზიყური ღვინო. პარალელურად, აქტიურად ვიღებთ მონაწილეობას ადგილობრივ გამოფენებსა და ფესტივალებში, რათა უფრო მეტ ადამიანს გავაცნოთ ჩვენი ქიზიყი და მზიანი ტიბაანის მიკროზონა, სადაც იბადება „ბოსტოღანა“ “, - ამბობს ნინი ბაშარული.

კომპანია ამჟამად ოთხი სახეობის ღვინოს აწარმოებს. ასორტიმენტს ახლახან დაემატა „კახური მწვანე“ – 2023 წლის მოსავალი.

„ამ ეტაპზე „ბოსტოღანას“ პროდუქციის ასორტიმენტი მოიცავს ოთხ სახეობას: ქისი, რქაწითელი, საფერავი და სულ ახლახანს გაყიდვაში ჩაეშვა კახური მწვანე - 2023 წლის მოსავალი. ჩვენთვის მნიშვნელოვანია, რომ მომხმარებელს მხოლოდ ტრადიციულად დაყენებული, მაღალი ხარისხის ღვინო შევთავაზოთ, თუმცა ამავდროულად ვცდილობთ მუდმივად განვავითაროთ პროდუქტი. პარალელურად ვატარებთ მცირე ექსპერიმენტებსაც, რათა მომავალში კიდევ უფრო საინტერესო და განსხვავებული ღვინოები შევთავაზოთ ღვინის მოყვარულებს “, - აღნიშნავს კომპანიის მარკეტინგის მენეჯერი.

„ბოსტოღანას“ სხვადასხვა კონკურენტული უპირატესობა გააჩნია. ყველაზე მთავარი კი ფასეულობები და ღირებულებებია.

„ჩვენი კონკრეტული უპირატესობა კომპანიის ფასეულობებსა და ღირებულებებშია, ჩვენ არ ვღალატობთ ღვინის დაყენების არცერთ წესს, მთელი პროცესი ჩვენს ხელშია. ღვინო, ბოთლში ჩამოსხმამდე უამრავ დეგუსტაციას გადის. თუ ვთლით რომ ის არ გვეკადრება და ადამიანის უღალატო თანმდევი არ იქნება ცხოვრების ნებისმიერ მომენტში იმ ღვინის მოსავალს გაყიდვაში არ ვუშვებთ “, - აცხადებს ნინი ბაშარული.

კომპანია აქტიურად მუშაობს, როგორც საექსპორტო ბაზრების, ასევე ასორტიმენტის გაფართოების მიმართულებით.

„ჩვენს სამომავლო გეგმებში შედის ასორტიმენტის გაფართოება და ექსპორტის გაძლიერება. მიმდინარე ეტაპზე ვმუშაობთ ღვინის ასორტიმენტის გამრავალფეროვნებაზე, რათა მომხმარებელს კიდევ უფრო განსხვავებული პროდუქცია შევთავაზოთ. ამის პარალელურად, ვაგრძელებთ აქტიურ მუშაობას საერთაშორისო ბაზრებზე, განსაკუთრებით  ექსპორტის მიმართულებით.

გვჯერა, რომ ქართული ღვინო მსოფლიო ბაზარზე ღირსეულად უნდა ფასდებოდეს, როგორც ხარისხით, ისე ღირებულებით. გვინდა ამაში ჩვენი წვლილიც იყოს “, - განმარტავს კომპანიის მარკეტინგის მენეჯერი.

აღსანიშნავია, რომ ღვინის კომპანია „ბოსტოღანამ“ 2021 წელს ტიბაანის მიკროზონაში მიიღო პირველი მოსავალი და იმავე წელს მომხმარებლებს შესთავაზა რეგიონისთვის დამახასიათებელი, ტრადიციული ჯიშებისგან დამზადებული ღვინოები: ქისი, რქაწითელი და საფერავი.