იუსტიციის სახლის მიერ ბაზარზე გამოტანილი სერვისი „ბიზნეს ასისტენტი“ თავიდან ბოლომდე ორიენტირებული იყო ბიზნესზე და მათ საჭიროებებზე იყო მორგებული, - აცხადებს იუსტიციის სახლის თავმჯდომარე ვახტანგ ჟვანია, რომელიც რადიო „სივრცის“ ეთერში, გადაცემა Business Insider Georgia-ს სტუმარი იყო.

მისი თქმით, იუსტიციის სახლმა მაქსიმალურად შეძლო ის, რომ პაკეტების კუთხით რამდენიმე განსხვავებული ვარიანტი შეეთავაზებინა ბიზნესისთვის.

„შეიძლება კონკრეტულმა ბიზნესმა ისარგებლოს ერთწლიანი მომსახურეობის პაკეტით, რომელიც შედარებით უფრო, ბუნებრივია, ძვირი ღირს, ვიდრე სხვა პაკეტები და ეს მოიცავს ყველა სერვისს, რაც იუსტიციის სახლთან არის დაკავშირებული. ასევე შეიძლება ისარგებლოს ექვსთვიანი პაკეტით, სამთვიანი პაკეტით. რეალურად, სანამ ბიზნესი გადაწყვეტს ჩვენთან ამ კუთხით თანამშრომლობას, მანამდე, ბუნებრივია, მას გააზრებული ექნება, რა ეტაპზეა. თუ ბიზნესს იწყებს და საჭიროა ძალიან ბევრი დოკუმენტის მომზადება, უფრო მეტი კომუნიკაცია იუსტიციის სახლთან, ბუნებრივია, მან შეიძლება პირველი 3 ან 6 თვის განმავლობაში ისარგებლოს ამ სერვისით, ამ პაკეტით, ამ მომსახურეობით და, რეალურად, როგორც კი ყველა ძირეულ დოკუმენტს მოამზადებს და უკვე ჩადგება იმ კალაპოტში, რომ უნდა გადავიდეს აქტიურ საქმიანობაზე, ამის შემდეგ ისარგებლოს ჩვეულებრივი სერვისით, რომელიც კიდევ ერთხელ ვიმეორებ - იუსტიციის სახლში ყველასთვის ხელმისაწვდომია და იქ ლოდინის დროც არის მინიმუმამდე დაყვანილი. უბრალოდ, იქიდან გამომდინარე, რომ შეიძლება კიდევ უფრო სისწრაფეს, გადაწყვეტილებების მიღებისას, ჰქონდეს მისთვის სასიცოცხლო მნიშვნელობა, ამ შემთხვევაში შეიძლება გამოიყენოს თუნდაც რაღაცა ნახევარწლიანი პაკეტი და მისით დაასრულოს ის ძირითადი საკითხები, მოაგვაროს ის ძირითადი საკითხები, რომელიც აწუხებს. თუ, ვთქვათ, ბიზნესი თავის შინაარსიდან გამომდინარე გულისხმობს იმას, რომ პერიოდულად უწევს აქტიური ურთიერთობა იუსტიციის სახლთან, ბუნებრივია, ამ შემთხვევაში კიდევ სხვა შესაძლებლობაა მისთვის და შეუძლია ამ მიმართულებით წავიდეს. ასე რომ, ჩათვალეთ ნებისმიერი მოცემულობა, რომელიც გათვალისწინებულია ამ პროექტით, მორგებულია ყველანაირ სეგმენტზე: დამწყებ ბიზნესზე, ასევე იმ ბიზნესზე, რომელსაც უკვე მთელი სისტემა აწყობილი აქვს და დროსთან დაკავშირებით აქვს გამოწვევები და უნდა, რომ ეს გამოწვევები დაძლიოს; ასევე, ის ბიზნესი, რომელმაც უკვე დაიწყო საქმიანობა, მაგრამ არ არის მაქსიმუმამდე ასული და სჭირდება დახმარება. ანუ, ჩათვალეთ, რომ ყველასთვის მორგებული შესაძლებლობები არის იუსტიციის სახლში“, - განმარტავს ვახტანგ ჟვანია.