სადაზღვევო კომპანია „ბენეფიტსის“ 2026 წლის სტრატეგიული პრიორიტეტები მოიცავს დისტანციური მომსახურებების არხების განვითარებას და სადაზღვევო პროდუქტების დივერსიფიკაციას. პრემიუმ მომსახურების სივრცის გახსნა და ახალი სადაზღვევო პროდუქტების დანერგვა წარმოადგენს კომპანიის განვითარების ძირითად მიმართულებებს, რომლებიც მიზნად ისახავს მომხმარებლის გამოცდილების გაუმჯობესებას, მათთვის თანამედროვე გადაწყვეტილებების შეთავაზებას და მომსახურების მიღების პროცესის გამარტივებას.

უფრო დეტალურად, როგორი იყო „ბენეფიტსისთვის“ 2025 წელი და რა გეგმები აქვს მიმდინარე წლისთვის - ამ საკითხებზე სასაუბროდ Business Insider Georgia სადაზღვევო კომპანია „ბენეფიტსის“ კომერციულ და ბიზნეს განვითარების დირექტორს, ანა შავგულიძეს ესაუბრა.

- როგორ შეაფასებთ „ბენეფიტსის“ 2025 წლის საქმიანობას? რა იყო წლის მთავარი მიღწევა?

- 2025 წელი „ბენეფიტსისთვის“ სტაბილური და დინამიკური ზრდის პერიოდი იყო. წლის განმავლობაში მოზიდული პრემიის მოცულობამ 82 239 908.06 ლარი შეადგინა, რაც გასულ წელთან შედარებით 42.23%-იანი ზრდის მაჩვენებელია; მათ შორის, სამედიცინო კუთხით ფიქსირდება 33.22%-იანი ზრდა, ხოლო არასამედიცინო მიმართულებით - 55.85%. წლის განმავლობაში კომპანია, მოზიდული პრემიის მოცულობით, ტოპ ხუთ სადაზღვევო კომპანიას შორის იმყოფებოდა სამედიცინო (ჯანმრთელობის) და სახმელეთო სატრანსპორტო საშუალებათა დაზღვევის კატეგორიებში.

დღეს „ბენეფიტსი“ ემსახურება 75 000-ზე მეტ დაზღვეულს და თანამშრომლობს საქართველოს მასშტაბით ყველა წამყვან პროვაიდერ კლინიკასთან. დაზღვევის 95%-იანი განახლების მაჩვენებელი მკაფიოდ ასახავს მომხმარებელთა მაღალ ნდობასა და კმაყოფილებას ჩვენი პროდუქტების მიმართ.

2025 წლის მთავარი მიღწევა მომხმარებელზე ორიენტირებული სერვისების განვითარება იყო. გამარტივებული პროდუქტების, სტრატეგიული პროექტებისა და პრემიუმ მიმართულებების დანერგვამ „ბენეფიტსს“ საშუალება მისცა, ბაზარზე ხარისხსა და სერვისზე ორიენტირებული ლიდერის პოზიცია კიდევ უფრო გაემყარებინა.

- დაზღვევის რომელი მიმართულებები იყო ყველაზე სწრაფად მზარდი?

- „ბენეფიტსისთვის“ 2025 წელს ყველაზე სწრაფად მზარდი არასამედიცინო მიმართულება იყო, სადაც როგორც უკვე აღვნიშნე ფიქსირდება 55.85%-იანი ზრდა. მათ შორის საგრძნობლად გაიზარდა ავტოდაზღვევაზე მოთხოვნა, რაც მომხმარებელთა ცნობიერებისა და პასუხისმგებლობის ზრდას უკავშირდება. ასევე, საჰაერო და მცურავი სატრანსპორტო საშუალებების, სარემონტო-სამშენებლო რისკებისა და ჰესების დაზღვევის კუთხითაც მნიშვნელოვნად გაიზარდა მომხმარებლის ინტერესი.

სტაბილური 33.22%-იანი ზრდის ტენდენცია შეინიშნება ჯანმრთელობის დაზღვევის კუთხითაც, სადაც  გამორჩეული წილი აქვს კორპორატიულ დაზღვევას. აღნიშნული ტენდენცია ნათლად ასახავს იმ ფაქტს, რომ თანამედროვე ბიზნესგარემოში კომპანიები სულ უფრო მეტ ყურადღებას უთმობენ თანამშრომელთა კეთილდღეობას და უპირატესობას ანიჭებენ ხარისხიან, მომხმარებელზე ორიენტირებულ სადაზღვევო პროდუქტებს.

- რა არის „ბენეფიტსის“ მთავარი კონკურენტული უპირატესობა?

- „ბენეფიტსის“ მთავარი კონკურენტული უპირატესობა მომხმარებელზე ორიენტირებული სერვისია. პირადი მენეჯერის მომსახურება, სწრაფი უკუკავშირი და დაზღვევის პროცესის სრულ ციკლზე მხარდაჭერა მომხმარებლებში რეალურ სიმშვიდესა და ნდობას განაპირობებს.

„ბენეფიტსის“ კონკურენტულ უპირატესობას კიდევ უფრო აძლიერებს საერთაშორისო დაზღვევის მიმართულებით დანერგილი მიდგომა. კომპანია მომხმარებლებს სთავაზობს ჯანმრთელობის დაზღვევას მსოფლიო მასშტაბით, ფაქტობრივი სამედიცინო ხარჯების სრული ანაზღაურებით. აღნიშნული სერვისის ეფექტიანობა დასტურდება მომხმარებელთა კმაყოფილების 93%-იანი მაჩვენებლით, რაც კომპანიის მაღალი სტანდარტების მკაფიო ინდიკატორია.

- რა პრიორიტეტები აქვს „ბენეფიტსს“ 2026 წლისთვის?

- 2026 წელს კომპანია განსაკუთრებულ ყურადღებას უთმობს მომხმარებლის გამოცდილების გაუმჯობესებას — დისტანციური მომსახურების არხების განვითარებას, სერვისების გაფართოებასა და სადაზღვევო პროდუქტების დივერსიფიკაციას, რათა მომსახურება კიდევ უფრო მარტივი, სწრაფი და ხელმისაწვდომი გახდეს.

ამასთან ერთად, წლის პირველ კვარტალში გაიხსნება ახალი პრემიუმ მომსახურების სივრცე, სადაც მომხმარებლებს შესაძლებლობა ექნებათ, ერთ სივრცეში მიიღონ სწრაფი, ეფექტური და მათ ინდივიდუალურ საჭიროებებზე მორგებული მომსახურება.

„ბენეფიტსის“ 2026 წლის მთავარი მიზანია მომხმარებლებს შესთავაზოს კიდევ უფრო მრავალფეროვანი, თანამედროვე და მათ საჭიროებებზე ორიენტირებული სადაზღვევო გადაწყვეტილებები, რაც უზრუნველყოფს მომსახურების მაღალი სტანდარტის შექმნას ბაზარზე.