ბათუმის სასტუმრო ბაზარზე წარმატებული ოპერირების შემდეგ, ბრენდი „მონარქი“ დედაქალაქში შემოსვლას გეგმავს. სასტუმრო, რომელიც სამი წლის წინ გაიხსნა და მფლობელი კომპანია „ინს გრუპის“ პორტფელის ნაწილია, გაფართოების გეგმას აქტიურად ამუშავებს და თბილისის ბაზარს სწავლობს.

კომპანიის  დამფუძნებელი, გია ლომინაძე, Business Insider Georgia-სთან აღნიშნავს, რომ ბრენდის ეფექტური მუშაობა და დადებითი დინამიკა მათ საშუალებას აძლევს, განიხილონ ახალი პროექტების განხორციელების შესაძლებლობა.

„Hotel Monarch Batumi ადგილობრივ ბრენდებს შორის იმდენად კარგად არის პოზიციონირებული, რომ ერთ-ერთ საუკეთესოდ ითვლება როგორც დატვირთულობის, ასევე პრაისინგისა და მაღალი რეიტინგების თვალსაზრისით. ბრენდი „მონარქის“ მიმართულებით, რა თქმა უნდა, მომავალშიც ვგეგმავთ განვითარებას. აქტიურად განვიხილავთ, რომ „მონარქის“ ბრენდით სასტუმრო თბილისში გავხსნათ“, — განმარტავს გია ლომინაძე.

რაც შეეხება Hotel Monarch Batumi-ს, სასტუმრომ 2025 წელი 75%-იანი დატვირთულობით დაასრულა და მენეჯმენტს არსებული მაჩვენებლების საფუძველზე იმედი აქვს, რომ 2026 წელს მეტ სტუმარს უმასპინძლებს.

„2025 წელს გვქონდა 75%-იანი წლიური დატვირთულობა, ხოლო სასტუმროს სტუმრების დიდი ნაწილი უცხოელები იყვნენ. ლიდერობენ ისრაელი და თურქეთი. ვფიქრობთ, რომ 2026 წელი უკეთესი იქნება, ვიდრე 2025 წელი იყო. წინასწარი ჯავშნები, რომლებიც მიმდინარე წლის ორი თვის განმავლობაში გვაქვს, ამის თქმის საშუალებას გვაძლევს და ასეთია ჩვენი პროგნოზიც - წელს 7-8%-ით მეტ სტუმარს მივიღებთ“, - აცხადებს გია ლომინაძე.

რაც შეეხება Hotel Monarch Batumi-ში განთავსების ფასების ზრდას, „ინს გრუპში“ განმარტავენ, რომ ეს მოთხოვნაზე იქნება დამოკიდებული.

აღსანიშნავია, რომ Hotel Monarch Batumi პოზიციონირებულია, როგორც 4-ვარსკვლავიანი სასტუმრო, თუმცა იმ შემთხვევაში, თუ იგივე ბრენდის სასტუმრო თბილისშიც გაიხსნება, მენეჯმენტის განცხადებით, ის აუცილებლად დააკმაყოფილებს 5-ვარსკვლავიანი სასტუმროს მოთხოვნებს.

სასტუმრო „მონარქი“ ბათუმში 2022 წლიდან ფუნქციონირებს. ის ბათუმის ძველ, ცენტრალურ უბანში, ახმედ მელაშვილის #37-ში მდებარეობს და კომპანია „ინს გრუპის“ საკუთრებაა. ახალ პროექტში კომპანიამ 14 მილიონი ლარის ინვესტიცია განახორციელა.

სასტუმრო Monarch-ი 5 000 კვადრატულ მეტრ ფართობზე განთავსებულ თანამედროვე, დახვეწილი ინტერიერის მქონე სასტუმროს წარმოადგენს, რომელიც მიმღებს, 67 ნომერს, ლობი-ბარს, საბილიარდო ოთახს, სპა სივრცეს, სასადილო სივრცეს, სამრეცხაოს, მიწისქვეშა პარკინგსა და ულამაზეს სქაი-ბარს აერთიანებს.

„მონარქი“ მორგებულია არა მხოლოდ ტურისტულ, არამედ საქმიან ვიზიტებზეც. მომხმარებლებს შესაძლებლობა აქვთ, ისარგებლონ სასტუმროს საკონფერენციო დარბაზით, რომელიც 60–80 ადამიანზეა გათვლილი.