Kass Group-ი თბილისის ანძის მოდერნიზაციის პროექტის განხორციელებას იწყებს. როგორც Business Insider Georgia-ს Kass Group-ში განუცხადეს, მშენებლობის პროექტის განხორციელებისთვის კომპანიას უკვე აღებული აქვს შესაბამისი ნებართვა და ამ დროისთვის პროექტის განფასების სამუშაოები მიმდინარეობს.

„ამის შემდეგ კი დაიწყება უშუალოდ სამშენებლო სამუშაოები, რომელიც ითვალისწინებს რესტორნის, ვიზიტორთა ცენტრის, პანორამული გადმოსახედის მოწყობას“, - აცხადებენ Kass Group-ში.

ცნობილია, რომ თბილისის ანძის მოდერნიზაციის პროექტზე ცნობილმა არქიტექტურულმა კომპანიამ „დემარკმა“ იმუშავა. პროცესში ასევე ჩართული იყვნენ სატელევიზიო ანძის მთავარი ინჟინრები „შიმანოვსკის ინსტიტუტიდან“ (უკრაინა), რომლებიც უშუალოდ პროექტის ექსპერტიზისა და მოწონების მიმართულებით იყვნენ აქტიურები.

Kass Group-ი აღნიშნული ობიექტის ოპერირებას განახორციელებს 25 წლის ვადით და მართვას გაუწევს სატელევიზიო ანძაზე ვიზიტორთა ცენტრს, პანორამულ რესტორანს და შესაბამის ინფრასტრუქტურას, რომლის მოწყობაც უკვე მისი ვალდებულებაა.

ირკვევა, რომ პანორამული რესტორანი განთავსებული იქნება 70 მეტრ სიმაღლეზე და დაახლოებით 110 სტუმარს უმასპინძლებს. ხელშეკრულებით გათვალისწინებულია არანაკლებ 5 მილიონი აშშ დოლარის ინვესტირება.

პროექტი ხორციელდება თბილისის მუნიციპალიტეტის მთავრობის მხარდაჭერით, რაც ასევე მოიცავს იმას, რომ თბილისის მთავრობის მხრიდან არაუმეტეს 1 000 000 ლარი მიმართული იქნება პროექტის განხორციელებასთან დაკავშირებული, საჭირო ინფრასტრუქტურის განვითარებაზე. გარდა ამისა, ოპერირების პერიოდში მუნიციპალიტეტი უზრუნველყოფს სატელევიზიო ანძის (გარდა საპროექტო ტერიტორიისა) განათებას იმ სტანდარტითა და ხარისხით, როგორც ეს ხდება დღეისათვის.