2025 წლის პირველი ნახევრის განმავლობაში სადაზღვევო კომპანიების მიერ მოზიდულმა სადაზღვევო პრემიამ 802 მლნ ლარი შეადგინა. ამავე პერიოდის შედეგებით მზღვეველების სადაზღვევო მოგება 162 მლნ ლარის დონეზე განისაზღვრა, ხოლო წმინდა მოგებამ 56 მლნ ლარი შეადგინა.
იანვარ-ივნისის მაჩვენებლებით, სადაზღვევო კომპანიების აქტივების ჯამური მოცულობა შეადგენს 1 727 მილიონ ლარს, ხოლო კაპიტალი 466 მილიონ ლარს.
მიმდინარე წლის 6 თვის მაჩვენებლების და ზოგადად ბაზრის ტენდენციების შესაფასებლად Business Insider Georgia-ს სადაზღვევო კომპანია არდის გენერალურ დირექტორს მიხეილ ჯაფარიძეს გაესაუბრა.

- 2025 წლის პირველი ნახევრის მაჩვენებლების მიხედვით როგორ აფასებთ საქართველოს სადაზღვევო ბაზრის დინამიკას?

- მთავარი ტენდენცია, რაც გამოიკვეთა არის ის, რომ ზრდის ტემპი შენელდა. თუ გასული წლის 6 თვის ზრდა 20,5% იყო, 2025 წლის ანალოგიური პერიოდის ზრდა 12.5%-ია, რაც დასაფიქრებელია. იმ შემთხვევაში თუ მთელი წლის მონაცემებიც ანალოგიური იქნება ეს იმის მანიშნებელი იქნება, რომ ბაზრის განვითარების ტემპი ნელდება და სიახლეა საჭირო.

- როგორ აფასებთ არდისთვის გასულ 6 თვეს, რა იყო ამ პერიოდში მთავარი მიღწევები? რა გამოწვევების წინაშე აღმოჩნდა სადაზღვევო კომპანია და როგორ გაუმკლავდით მათ?

- არდისთვის ძალიან საინტერესო და დატვირთული პერიოდი გამოდგა, რადგან კომპანიამ განაახლა ბრენდი და თავისი პოზიციონირების ფოკუსი გაზარდა, როგორც მაღალი სამომხმარებლო სტანდარტის კომპანიამ. დავიწყეთ აპლიკაციის, ვებ-გვერდის და სხვა ტექნოლოგიური და სერვისული გადაწყვეტილებების განახლება.

პირველ კვარტალში გარკვეული გამოწვევები იყო კონკრეტულ კორპორაციული კლიენტების სეგმენტში, თუმცა ეს ერთჯერადი პროცესი იყო და შემდგომ პერიოდში ამ დინამიკის გაგრძელებას აღარ ველოდებით.

- რომელი პროდუქტები ან მიმართულებები იყო ყველაზე წარმატებული ამ პერიოდში? დაზღვევის რომელ ტიპებზე იზრდება მოთხოვნა ყველაზე სწრაფად და როგორ პასუხობთ ამ ტენდენციებს?

- კონკრეტულ სახეობას არ გამოვყოფდი, ბაზრის ძირითადი მამოძრავებელი ისევ სამედიცინო დაზღვევაა და შემდეგ სხვა სახეობები (ავტოდაზღვევა, ქონება და ა.შ.). გარკვეული ტემპის გაციება შეინიშნება და ცხადია ეს საყურადღებოა.

- საანგარიშო პერიოდში არდის მაგალითზე, რამდენად გაუმჯობესდა ფინანსური მაჩვენებლები მაგალითად, პოლისების ზრდა, მომხმარებელთა ბაზის გაფართოება, კორპორატიული კლიენტების წილი? ასევე საინტერესოა როგორ შეიცვალა არდის შიდა პროცესები ან სტრატეგია ბოლო 6 თვეში, განსაკუთრებით ციფრული ტრანსფორმაციის კონტექსტში?

- კომპანიის ფინანსური შედეგები მეტ-ნაკლებად შარშანდელი მდგომარეობის მსგავსია. კომპანიის ზრდა ბაზრის საერთო ზრდას მიუყვება, თუმცა მოკლევადიან რყევებს შედარებით ნაკლებ ყურადღებას ვაქცევთ და მთავარი ფოკუსი ჩვენი საშუალო და გრძელვადიანი მიზნების მიღწევაზეა.

ყველა იმ სიახლის და ცვლილების შედეგს რაც წელს დავიწყეთ მომავალი წლიდან დავინახავთ, როდესაც შედეგების გაზომვას დავიწყებთ და გარდა ამისა სიახლეების მიმდინარე წლის გეგმა არ დასრულებულა და კიდევ ბევრი რამ დაგვრჩა გასაკეთებელი.

- როგორია არდის პოზიციონირება დღეს დაზღვევის ბაზარზე, კონკურენტებთან შედარებით და ასევე როგორ ხედავთ თქვენი კომპანიის როლს დაზღვევის კულტურის განვითარებაში საქართველოში?

- ზოგადად, არდი აქტიურობს საშუალო და და მაღალ სამომხმარებლო სეგმენტში და სერვისებიც აქვს შესაბამისი სტანდარტის, თუმცა ეს ყველაფერი ჯერ კიდევ ძალიან შორსაა იმისგან, რასაც ჩვენ ვისურვებდით. ბევრი რამ შესაძლოა გაკეთდეს ბევრად უკეთესად და ერთდროულად ეს არის კავშირში სადაზღვევო კულტურის განვითარებასთან და ჩვენი აქტივობა თავად ამ ცნობადობის ზრდას ეხმარება.

- როგორია ინდუსტრიაში მომხმარებელთა ნდობის მაჩვენებელი და რამდენად გაიზარდა დაზღვევის მიმართ ინტერესის კულტურა?

- ამის ობიექტური საზომი სამწუხაროდ არ არსებობს, მაგრამ თუ შევხედავთ იმას, რომ ტემპი შენელდა ეს არ არის სახარბიელო.

- როგორ ფიქრობთ, რამდენად სწორად რეგულირდება დაზღვევის ბაზარი დღეს საქართველოში? არის თუ არა საჭირო დამატებითი რეგულაციები ან სტიმულები სექტორის გაძლიერებისთვის?

ბაზრის რეგულირების ნაკლებობა არ გვაქვს უფრო სტიმულისა და საერთო ცნობადობის ნაკლებობაა, რაც საბოლოო ძალიან საჭირო და პოტენციალის მქონე ინდუსტრია მეორე თანრიგის სექტორად მოჩანს, მაშინ როდესაც სადაზღვევო კომპანია ფინანსური ინსტიტუტია და ყველა სექტორისთვის და ნებისმიერი ადამიანისთვის აუცილებელია ჩვენი პროდუქტები.

- რამდენად კონკურენტულია ბაზარი და რა ტიპის კონკურენციას ანიჭებთ უპირატესობას: ფასობრივს, ხარისხობრივს თუ ტექნოლოგიურს?

- როგორც ზემოთ ავნიშნეთ, არდიში ძალიან ცდილობს არ შევიდეთ მხოლოდ საფასო კონკურენციაში. ჩვენი მიზანი საუკეთესო ღირებულების ანუ საუკეთესო პროდუქტის შექმნაა ფართო დაფარვით, სიმარტივით, ინოვაციით და სერვისის ხარისხით. მხოლოდ ამის შემდეგ მოდის ფასი, რაც შემადგენელი ელემენტებიდან გამომდინარეობს. მათთვის, ვისთვისაც ფასი მთავარია და სხვა უამრავ ნიუანსს არ ნაკლები მნიშვნელობა აქვს ბაზარზე საკმაოდ დიდი არჩევანია და თუმცა ჩვენ ამ არ ვაქტიურობთ ამ მიმართულებით. ვცდილობთ შევინარჩუნოთ ის, რასაც 15 წელია ვავითარებთ. ჩვენთვის მთავარია რას ვპირდებით მომხმარებელს და შემდეგ ამას როგორ ვასრულებთ.