არაერთი ტექნიკური ვიზიტი შედგა კომპანიის მხრიდან, — ამის შესახებ „იმედის დილაში“, რუბრიკა Business Insider Georgia-ში, სააგენტო „აწარმოე საქართველოში“-ს დირექტორის მოადგილემ თორნიკე ზირაქიშვილმა საქართველოში Starbucks-ის ბრენდის შემოსვლასთან დაკავშირებით განაცხადა. მისი თქმით, მოლაპარაკებები აქტიურია და იგი გარკვეული პერიოდია, რაც მიმდინარეობს.

„კომპანიას ნამდვილად ვემუშავებთ, სამუშაო პროცესები აქტიურია. აქვე მინდა დიდი მადლობა გადავუხადო საგარეო საქმეთა სამინისტროს და ქუვეითში საქართველოს საელჩოს, რომლებიც აქტიურად იყვნენ ჩართულები ამ პროცესში და ძალიან დიდი მხარდაჭერა აღმოგვიჩინეს. რეალურად პროცესი მიმდინარეობდა გარკვეული პერიოდის განმავლობაში, არაერთი ტექნიკური ვიზიტი შედგა კომპანიის მხრიდან და უახლოეს მომავალში საერთო განცხადებასაც გავავრცელებთ“, — აღნიშნა ზირაქიშვილმა.

მისი თქმით, სააგენტო „აწარმოე საქართველოში“ ქვეყანაში ახალი კომპანიების და ინვესტორების შემოყვანის პროცესს აგრძელებს.

„ჩვენი სააგენტოს ერთ-ერთი საქმიანობის ნაწილია, რომ დიდწილად გვიწევს ბევრი რაღაცის კონფიდენციალურად შენახვა, რადგან კომპანიების ინტერესიდან გამომდინარე ვერ ვასაჯაროებთ, ვიდრე არ გვაქვს თანხმობა ამ კომპანიებიდან. არაერთი კომპანიისგან გვაქვს უკვე ინტერესი, წლების განმავლობაში ჩვენ არაერთი პროექტი მოვიტანეთ — 20-ზე მეტი მნიშვნელოვანი ბრენდის, კომპანიის შემოყვანა მოხდა. დაწყებული IT მიმართულებიდან, ბიზნესპროცესების აუთსორსინგიდან და სხვა სექტორებიდან. ამიტომაც სამომავლოდაც გპირდებით, რომ იქნება ძალიან სასიხარულო სიახლეები“, - აღნიშნა ზირაქიშვილმა.

ეკონომიკისა და მდგრადი განვითარების სამინისტროს სააგენტო „აწარმოე საქართველოში“-ს ინფორმაციით, ბოლო რამდენიმე წლის განმავლობაში სააგენტო ინტენსიურად თანამშრომლობს Alshaya Group-თან Starbucks-ის ბრენდის საქართველოს ბაზარზე შემოსვლასთან დაკავშირებით.

„საქართველოს ბაზარზე ბრენდის შემოსვლის საკითხი აქტიურ ეტაპზე გადავიდა, 2025 წელს საქართველოს რამდენჯერმე ეწვია კომპანიის მაღალი რანგის დელეგაცია. სააგენტოსთან მჭიდრო კოორდინაციით მიმდინარეობს ბაზრის სიღრმისეული შესწავლა, ლოკაციების დათვალიერება და პოტენციურ პარტნიორთან შეხვედრები“, - განაცხადა სააგენტოს დირექტორმა მიხეილ ხიდურელმა.

„აწარმოე საქართველოში“ დირექტორის ინფორმაციით, ბაზრის კვლევის პროცესი მოიცავს როგორც თბილისის, ასევე ბათუმისა და სხვა მსხვილი ქალაქების შეფასებას, სადაც კომპანია რამდენიმე ობიექტის გახსნის შესაძლებლობას განიხილავს.