WonderMore Toys  პრემიუმ ხარისხის ხის სათამაშოების მწარმოებელი ბრენდია, რომელიც სულ რამდენიმე თვეა ბაზარზე ოპერირებს. მეტი ინფორმაციისთვის, Business Insider Georgia ბრენდის თანადამფუძნებელს ანუკა მეგრელიშვილს ესაუბრა.

როგორია კომპანიის საქმიანობის სფეციფიკა, როდის დაიწყეთ საქმიანობა და რას სთავაზობთ მომხმარებლებს?

WonderMore Toys-ის საქმიანობის მთავარი სპეციფიკა ბავშვებისთვის არა უბრალოდ სათამაშოების, არამედ მთელი სამყაროების შეთავაზებაა. ჩვენ ვქმნით პრემიუმ ხარისხის ხის სათამაშოებს, რომლებიც დიზაინითა და ფუნქციით ბავშვის წარმოსახვის კატალიზატორი ხდება.

ბრენდი ბაზარზე სულ რამდენიმე თვის წინ გამოჩნდა, თუმცა ამას წინ უძღოდა ერთწლიანი ინტენსიური მუშაობა. ეს პერიოდი სრულად დავუთმეთ არა მხოლოდ პროდუქტების დიზაინის სრულყოფას, არამედ იმ ბრენდის კონცეფციის ჩამოყალიბებას, რომელიც იდეალურად გადმოსცემს ჩვენს მთავარ ფასეულობებს.

მომხმარებელს ვთავაზობთ ესთეტიკურ, მოდულურ სათამაშოებს — იქნება ეს ჩვენი თეატრი, კაფე თუ მაღაზია. ეს არის ნივთები, რომლებიც, ჩვენი ერთ-ერთი მთავარი ღირებულებისამებრ, გვთავაზობს „ერთ სათამაშოს და უამრავ ისტორიას“.

როგორ აფასებთ მოთხოვნას და ინტერესს ზოგადი თვალსაზრისით?

მიუხედავად იმისა, რომ ბაზარზე ახლები ვართ, ინტერესი და უკუკავშირი ძალიან მაღალი და პოზიტიურია. ვფიქრობთ, ეს განპირობებულია იმით, რომ თანამედროვე მშობლები აქტიურად ეძებენ ისეთ ალტერნატივებს, რომლებიც ესთეტიკური, ეკოლოგიურად სუფთა და რაც მთავარია, განმავითარებელია.

მომხმარებელი ხედავს, რომ WonderMore Toys არ არის ერთჯერადი გასართობი, არამედ ინვესტიციაა ბავშვის შემოქმედებით განვითარებაში. ეს დადებითი გამოხმაურება გვარწმუნებს, რომ სწორ გზაზე ვდგავართ.

ჩვენი მთავარი ამოცანა ამ ეტაპზე არის ბრენდის ცნობადობის გაზრდა, რათა რაც შეიძლება მეტ ოჯახს მივაწოდოთ ინფორმაცია ჩვენი პროდუქტების და იმ ფასეულობების შესახებ, რასაც ვქმნით.

რას მიიჩნევთ კომპანიის კონკურენტულ უპირატესობად?

ჩვენს კონკურენტულ უპირატესობას სამი ძირითადი მიმართულება განსაზღვრავს:

1. თამაშის ფილოსოფია: WonderMore-ის სათამაშოები არ კარნახობს ბავშვს თამაშის წესებს. ჩვენი პროდუქტები ღია ტიპისაა და სრულ თავისუფლებას აძლევს წარმოსახვას. ეს არის „სამყარო შენი წესებით“, რომელიც ბავშვს ეხმარება, იყოს შემოქმედი და საკუთარი ისტორიების ავტორი;

2. დიზაინი და ხარისხი: ჩვენ არ ვქმნით უბრალოდ სათამაშოებს — ეს არის ესთეტიკური ობიექტები, რომლებიც ბავშვის ოთახს და სახლის ინტერიერს ალამაზებს. ამასთან, ვიყენებთ მხოლოდ ეკოლოგიურად სუფთა ხის მასალას, რაც მშობელს აძლევს ხარისხის და უსაფრთხოების გარანტიას;

3. მოდულური ეკოსისტემა: ჩვენი პროდუქტები — თეატრი, კაფე, მაღაზია არ არის ცალკეული ნივთები. ისინი ერთმანეთთან თავსებადია და ქმნის ერთიან, გაფართოებად სამყაროს. მომხმარებელი ყიდულობს არა ერთ სათამაშოს, არამედ „სამყაროს პირველ ნაწილს“, რომლის განვრცობაც მომავალში შეუძლია.

როგორია კომპანიის სამომავლო გეგმები?

ჩვენი სამომავლო გეგმები ძალიან ამბიციურია. უპირველესი მიზანია ასორტიმენტის სტრატეგიული გაფართოება. ჩვენ უკვე აქტიურად ვმუშაობთ რამდენიმე სრულიად ახალ და ინოვაციურ პროდუქტზე, მათ შორის, მაგიდის თეატრების სერიაზე, რომელსაც მოჰყვება ჩვენ მიერ შექმნილი უნიკალური ზღაპრები.

ჩვენი მიზანია, გავაღრმავოთ ჩვენი „მოდულური სამყაროს“ კონცეფცია და შევთავაზოთ მომხმარებლებს კიდევ უფრო მეტი შესაძლებლობა საკუთარი, უნიკალური WonderMore-ის ქალაქის ასაწყობად.

მეორე მთავარი მიმართულება, რა თქმა უნდა, ცნობადობის გაზრდაა. ჩვენ გვინდა, WonderMore Toys გახდეს არა უბრალოდ ბრენდი, არამედ ხარისხიანი, შემოქმედებითი და ესთეტიკური თამაშის სინონიმი საქართველოში."