Svanidze Olive Oil / სვანიძის ზეთისხილის ზეთი ექსპორტზე მასშტაბური გასვლისთვის ემზადება, თუმცა მანამდე ახალ საწარმოში ISO-ს შესაბამისობის სერტიფიკატის დანერგვაზე მუშაობს, რაც საექსპორტო ბაზრებზე წვდომას გაუმარტივებს.

როგორც Business Insider Georgia-სთან კომპანია „სვანიძის ზეთისხილის“ დირექტორმა, ნიკა მარკოზაშვილმა განაცხადა, ზეთისხილის მოსავალი უკვე დაბინავებულია და ახლა მისი გადამუშავება მიმდინარეობს.

„მოსავალი დავაბინავეთ. ჩვენი ბაღები თანდათან უფრო და უფრო შედის მსხმოიარობაში, რადგან სხვადასხვა ასაკის ბაღები გვაქვს. ზოგი გარდამავალ ფაზაშია, ზოგი მსხმოიარეა, ზოგი კი ახლა იწყებს მსხმოიარობას. მოსავალი (ნაყოფი) დაახლოებით 350-450 ტონამდეა. დედოფლისწყაროში ახალი საწარმო გავხსენით - ახალი დანადგარებით, რამაც მოგვცა იმის საშუალება, რომ მოკრეფიდან დამუშავებამდე მოკლე დრო გვქონდეს. შესაბამისად, ხარისხი უკეთესია, ანუ მოკრეფიდან გადამუშავებამდე დაყოვნება ნაკლები დროით ხდება, რაც უზრუნველყოფს უმაღლეს ხარისხს. რაც შეეხება წარმოების კუთხეს, დანადგარებიც უკვე ავტომატიზებულია. ეს არის იტალიური დანადგარები, რომელთა წარმადობაც საათში დაახლოებით 1500-დან 2000 ბოთლამდეა“, - აცხადებს ნიკა მარკოზაშვილი.

„სვანიძის ზეთისხილის“ დირექტორის განმარტებით, ახალი საწარმო კომპანიას ზეითისხილის ზეთის გარდა ზეთისხილის სხვა პროდუქტების სერიული გამოშვების შესაძლებლობასაც აძლევს.

„თვითონ საწარმოს პროექტი გაყოფილია ორ ნაწილად. პირველი ფაზა, რომელიც უკვე დასრულდა, ზეთის წარმოების ნაწილს მოიცავდა. ეს არის მთლიანი ციკლი, ანუ გადამუშავება, დაფასოება, ჩამოსხმა, რეალიზაცია თავისი დასაწყობებით. შემდეგი ფაზა კი უკვე დაგეგმილია მიმდინარე წელს - ეს არის მარინადების წარმოება, რისთვისაც საწარმო კონსტრუქციულად წინასწარ არის მოწყობილი“, - აცხადებს „სვანიძის ზეთისხილის“ დირექტორი.

ირკვევა, რომ „სვანიძის ზეთისხილი“ მარინადების სერიულ წარმოებას უკვე 2026 წლის მოსავლიდან დაიწყებს.

„2025 წლის მოსავლიდან გვაქვს მცირე წარმოება ისე, როგორც აქამდე ვაწარმოებდით, მცირე მოცულობებით. თუმცა უშუალოდ დიდ მასშტაბებზე უკვე მომავალი წლიდან გადავალთ, მას შემდეგ, რაც დანადგარები დაგვემატება“, - აღნიშნავს ნიკა მარკოზაშვილი.

ახალი საწარმოს გახსნამ, თანამედროვე ტექნოლოგიებმა და მომხმარებლის ცნობიერების გაზრდამ „სვანიძის ზეთისხილის“ პროდუქციაზე მოთხოვნა საკმაოდ გაზარდა.

„გაყიდვები 30-35 პროცენტით არის გაზრდილი. ეს ძირითადად ადგილობრივ ბაზარს მოიცავს. ეს განაპირობა იმანაც, რომ ფასის შესაბამისად გვაქვს გარკვეული ვარირების საშუალება; თუ ადრე მეტი ადამიანური რესურსი იყო ჩართული ერთეული ბოთლის წარმოებაში და თვითღირებულება უფრო მაღალი იყო, ახლა დანადგარები ამის საშუალებას გვაძლევს, რომ ეს ფასზეც აისახოს.

პარალელურად მიდის ISO-ს შესაბამისობის სერტიფიკატების დანერგვა. ეს არის პროცესი, რათა ყველა ბაზარზე თავისუფალი წვდომის საშუალება გვქონდეს. მოთხოვნა საკმაოდ დიდია როგორც აზიური ბაზრიდან, ისე დსთ-ს ქვეყნებიდან და ასევე ევროპიდან. მოთხოვნა უფრო მეტად არის ისრაელიდან და აშშ-დან. საკმაოდ მაღალი მოთხოვნა და მომართვიანობაა. შესაბამისად, ეტაპობრივად მივდივართ იქამდე, რომ უკვე დავიწყებთ საექსპორტო ბაზრის ათვისებას.

ISO-ს დანერგვა, მოკლედ რომ ვთქვათ, სადღაც 3-დან 6 თვემდე პროცესია და, შესაბამისად, წლის ბოლომდე შესაძლებელი იქნება ექსპორტის განხორციელება“, - აღნიშნავს „სვანიძის ზეთისხილის“ დირექტორი.

აღსანიშნავია, რომ „სვანიძის ზეთისხილი“ თავის ახალ საწარმოში ზეთისხილის მიღებას ფერმერებისგანაც ახდენს.

„დიახ, ვისაც ექნება შესაბამისი ხარისხისა და კლასის ზეთისხილი, მივიღებთ. რა თქმა უნდა, ნაყოფი არ უნდა იყოს კვირეობით დალაგებული და ა.შ. ყველასგან ჩავიბარებთ და გადავამუშავებთ. ორი ნაწილი გვექნება: ერთი, რომ შევთავაზებთ შესყიდვას - უშუალოდ ჩავიბარებთ და ჩვენ გადავამუშავებთ ნაყოფს, და მეორე -  მომსახურება: შესაძლებელია, რომ მომსახურება გავუწიოთ ფერმერს“, - აღნიშნავს ნიკა მარკოზაშვილი.

ბოლო პერიოდში ფერმერების მხრიდან ზეთისხილის მოყვანაზე ინტერესი გაზრდილია, რაზეც გარკვეული გავლენა „დანერგე მომავალმაც“ იქონია.

„ინტერესი გაზრდილია. კულტურა დაახლოებით 4-5 წლიდან უკვე იწყებს მსხმოიარობას. „დანერგე მომავლის“ ფარგლებში 3000 ჰექტარზე მეტია გაშენებული, რასაც ემატება ის ბაღები, რომლებიც ფერმერებმა თავად გააშენეს. ვინაიდან ეს ბაღები მსხმოიარობაში შედის, ჩაბარებისა და გადამუშავების მოთხოვნა გაზრდილია და ყოველ წელს კიდევ უფრო გაიზრდება. ეს არის ბაზრის ბუნებრივი მაჩვენებელი, რადგან რაც უფრო გაიზრდება ხე, მით მეტ ნაყოფს ისხამს, მეტი მოსავალია და, შესაბამისად, გადამუშავების მოთხოვნაც გაცილებით დიდია“, - აცხადებს კომპანია „სვანიძის ზეთისხილის“ დირექტორი.

შეგახსენებთ, რომ „სვანიძის ზეთისხილის“ ახალი, თანამედროვე გადამამუშავებელი საწარმო 2025 წლის ბოლოს გაიოხსნა. ეს მასშტაბი საქართველოს ზეთისხილის ზეთის წარმოების ისტორიაში სრულიად ახალ სტანდარტს აყალიბებს.

ახალი საწარმო გამორჩეულია თავისი ეკომეგობრული მიდგომითა და ინოვაციური ტექნოლოგიებით - აქ იწარმოება უმაღლესი ხარისხის Extra Virgin ზეთისხილის ზეთი.