Winery Zodi – მარანი ზოდი, რომელიც საკუთარ ღვინოებს ექსპორტზე კანადაში, გერმანიაში, ნიდერლანდებში, დანიაში, პორტუგალიასა და საფრანგეთში ყიდის, აზიის ბაზარზე შესასვლელად ემზადება.

„მარანი ზოდი“ 2019 წელს დაარსდა და ის ჭიათურის მუნიციპალიტეტის სოფელ ზოდში მდებარეობს.

„ჩვენი ვენახები განთავსებულია აკაკი წერეთლის სახლ-მუზეუმში. ვაწარმოებთ 6 სახეობის ღვინოს, მათგან 3 არის მშრალი, 2 – ნახევრად მშრალი, ხოლო 1 – ნახევრად ტკბილი. ვაწარმოებთ როგორც წითელ, ასევე თეთრ ღვინოს. ღვინის გაყიდვები ადგილობრივ ბაზარზე 2021 წლიდან დავიწყეთ,“ – განაცხადა Business Insider Georgia-სთან საუბრისას „მარანი ზოდის“ დამფუძნებელმა და მეღვინემ, გიგა ჭიღლაძემ.

მისივე განმარტებით, „მარანი ზოდის“ ღვინოები უკვე წარმოდგენილია ექვს საექსპორტო ბაზარზე და კომპანია ძირითადად გრძელვადიან კონტრაქტებით არის დაინტერესებული.

„ამ დროისთვის საექსპორტო ბაზრებიდან ყველაზე დიდი გაყიდვები გვაქვს ნიდერლანდებში, თუმცა საფრანგეთიდან იმდენი შეკვეთა შემოგვივიდა, რომ სავარაუდოდ საფრანგეთი დაიკავებს პირველ ადგილს. საფრანგეთში მორიგი გადაზიდვისთვის უკვე მზად ვართ — პროდუქცია გამზადებულია და მალე უნდა წავიდეს,“ – აცხადებს „მარანი ზოდის“ დამფუძნებელი.

ირკვევა, რომ 2025 წელს „მარანი ზოდის“ მიერ შედარებით ნაკლები ყურძნის გადამუშავება მოხდა, ვიდრე 2024 წლის სეზონზე.

„ჩვენი წარმოებისთვის საკუთარ ვენახებში მოწეული ყურძენი არ გვყოფნის, ამიტომ ვიბარებთ ფერმერებისგანაც. სიმართლე გითხრათ, წელს მოსავალი შედარებით ნაკლები იყო და შარშანდელთან შედარებით დაახლოებით 20%-ით ნაკლები ნედლეული გადავამუშავეთ,“ – აღნიშნავს გიგა ჭიღლაძე.

2025 წლის მოსავლით დამზადებული ღვინოების რეალიზაციას „მარანი ზოდი“ 2026 წლის მაისიდან დაიწყებს. დღეს კომპანიის გაყიდვების დაახლოებით 30–40% მოდის საექსპორტო ბაზრებზე, თუმცა „მარანი ზოდი“ აქტიურად მუშაობს ბაზრების დივერსიფიკაციაზე და მალე აზიის ბაზარზე შესვლის იმედი აქვს.

„აზიის ბაზარზე შესასვლელად ვცდილობთ პოზიციონირებას. ამის გამო კონკურსში Asia Wine Trophy მივიღეთ მონაწილეობა და ჩვენს ცოლიკაურს ოქროს მედალი მიენიჭა. ეს არის წინ გადადგმული ნაბიჯი, რომელიც დაგვეხმარება აზიის ბაზარზე შესვლასა და პოზიციონირებაში.

პირველ რიგში ვცდილობთ კორეის ბაზარზე მოხვედრას. უკვე გვქონდა რამდენიმე ადამიანთან შეხვედრა და მათი სურვილი იყო, რომ Asia Wine Trophy-ში მიგვეღო მონაწილეობა. გვითხრეს, რომ თუ გავიმარჯვებდით, გზა გაიხსნებოდა და მართლაც ასე მოხდა,“ – ამბობს „მარანი ზოდის“ დამფუძნებელი.

აღსანიშნავია, რომ „მარანი ზოდის“ ღვინოები ადგილობრივ ბაზარზე იყიდება სპეციალიზებულ ღვინის მაღაზიებში, მაგალითად ისეთებში, როგორიცაა „8000 მოსავალი“. გარდა ამისა, ღვინო წარმოდგენილია „კარფურის“ და „გუდვილის“ ჰიპერმარკეტებში.

„ჩვენი ღვინო ინდუსტრიული წარმოების არ არის. ვცდილობთ, რომ ვაწარმოოთ მაღალხარისხიანი ღვინოები. ამიტომ დიდ რაოდენობას არ ვქმნით და ორიენტირებულები ვართ ხარისხზე. ფასიც ძალიან მაღალი არ გვაქვს, თუმცა არც მასობრივი ღვინოების კატეგორიაში ვექცევით. ჩვენი ღვინოების ფასი საშუალოდ 35–50 ლარის ფარგლებში მერყეობს.

ადგილობრივ ბაზარზე ყველაზე მოთხოვნადია ნახევრად ტკბილი და მშრალი ღვინოები,“ – განმარტავს გიგა ჭიღლაძე.