„ავეჯია“ ეკომეგობრული და სრულიად უსაფრთხო საბავშვო ავეჯის ქართული ბრენდია, რომელსაც ბაზარზე მუშაობის 25 წლიანი გამოცდილება აქვს. ბრენდის დამფუძნებელი ნინო სამხარაძე Business Insider Georgia -სთან საუბარში აღნიშნავს რომ „ავეჯია“ Spielwarenmesse 2026 - ზე მიიღებს მონაწილეობას.

„ავეჯიას შემქმნელებისთვის განსაკუთრებით სასიხარულოა ის, რომ სწორედ სათამაშოების ინდუსტრიაში საერთაშორისო პლატფორმაზე მონაწილეობის საშუალება მოგვეცა, რადგან ჩვენი ხედვა ბავშვის ცხოვრებაში თამაშის როლსა და ამ გზით სამყაროს შემეცნებას უკავშირდება.

ავეჯია/AVEGGIA „აწარმოე საქართველოში“ სახელმწიფო პროგრამის ბენეფიციარია. სწორედ „აწარმოეს“ რეკომენდაციით შევიტანეთ Spielwarenmesse 2026 წლის საერთაშორისო გამოფენაზე მონაწილეობის განაცხადი. შესარჩევ კონკურსში ჩვენი კომპანია გამოვლინდა გამარჯვებულად. მოგეხსენებათ, გამოფენა Spielwarenmesse სათამაშოების ინდუსტრიაში ყველაზე პრესტიჟული და წარმომადგენლობითი B2B პლატფორმაა, სადაც საშუალება გვეძლევა ამ სფეროს უმსხვილეს წარმომადგენლებს გავაცნოთ ქართული პროდუქტი, სათამაშო სივრცის ჩვენეული ხედვა და დიზაინი.

ზოგადად, საერთაშორისო გამოფენებსა და ფორუმებში მონაწილეობა ქართული კომპანიებისთვის იდეალური შესაძლებლობაა ექსპორტის განსავითარებლად. კონკრეტულად Spielwarenmesse-ს პლატფორმა ჩვენთვის განსაკუთრებული და ახალი გამოწვევაა. დარწმუნებული ვართ, ეს გამოცდილება სერიოზულ ბიძგს მისცემს ჩვენს წარმოებას, როგორც შემოქმედებითი, ასევე ტექნოლოგიური და მარკეტინგული თვალსაზრისით, რაც მნიშვნელოვნად განსაზღვრავს ავეჯიას სამომავლო პერსპექტივას “, - აცხადებს ნინო სამხარაძე.

ცნობისთვის, ბრენდის პროდუქცია განკუთვნილია 2-დან 8 წლამდე პატარებისთვის და თანაბრად არის მორგებული როგორც ბავშვის, ასევე მშობლის საჭიროებებსა და მოთხოვნებზე.