საზღვარგარეთ დასვენებაზე მოთხოვნა ყოველწლიურად იზრდება, რადგანაც თბილისსა და ქუთაისში გვემატება ახალ-ახალი მიმართულებები და ავიაკომპანიები, - ამის შესახებ Business Insider Georgia-სთან კომპანია Turebi.Ge-ს აღმასრულებელმა დირექტორმა ნინი ადამიამ განაცხადა. მისი განმარტებით, იზრდება ასევე შობა-ახალი წლის პერიოდის უცხოეთში გატარებაზე მოთხოვნა, სადაც ევროპა უპირობო ლიდერია.

„საშობაო ბაზრობების კუთხით მოთხოვნა გვაქვს ევროპის მიმართულებებზე - აქტიური მოთხოვნაა პრაღის, ვენის, ბუდაპეშტის მიმართულებაზე. ასევე მოთხოვნაა პარიზის დისნეილენდზეც, რადგან ამ პერიოდში პარიზში და მით უმეტეს დისნეილენდში ზღაპრული გარემოა. რაც შეეხება პაკეტების ღირებულებას - დაახლოებით იგივეა, რაც გასულ წელს იყო. თუ გავითვალისწინებთ, რომ ამ დროისთვის Black Friday-ს ფასდაკლებებია და ავიაკომპანიებიდან შემოთავაზებებია, საკმაოდ შეღავათიანი ტარიფებით სარგებლობენ მგზავრები“, - განმარტავს ნინი ადამია.

Turebi.Ge-ს აღმასრულებელი დირექტორის თქმით, ახალი წლის შესახვედრად ქართველები ევროპის გარდა თბილ ქვეყნებსაც აქტიურად ირჩევენ.

„მოთხოვნა ისევ ევროპის ქალაქებზეა, თუმცა წელს აქტიურია მოთხოვნა ეგვიპტეზე, დოჰაზე. გეტყვით, რომ ამ პერიოდში ტაილანდში და არაბთა გაერთიანებულ საამიროებში დასვენებაზეც საკმაოდ მაღალი მოთხოვნაა.

ევროპაში დასვენება უფრო ბიუჯეტურ ფასებშია შესაძლებელი, ვიდრე თბილ ქვეყნებში, თუმცა თბილ ქვეყნებში ტურისტებისთვის all-inclusive დასვენება და თბილისიდან ფრენები არის შეთავაზებული.

საზღვარგარეთ დასვენებაზე მოთხოვნა ყოველწლიურად იზრდება, რადგანაც თბილისსა და ქუთაისში გვემატება ახალ-ახალი მიმართულებები და ავიაკომპანიები. შესაბამისად, ეს ყველაფერი მოთხოვნას ზრდის. რაც უფრო მეტი ავიაკომპანია შემოდის ჩვენს ბაზარზე და ახალი მიმართულებები გვემატება, კონკურენციისა და ფასების დასტაბილურების კუთხით უკეთესია. თუ მანამდე შვეიცარიასა და ბრიტანეთში პირდაპირი ფრენები არ გვქონდა, წელს უკვე შეგვიძლია ჟენევასა და ლონდონში გავფრინდეთ. ასევე, თბილისის მიმართულებით პირდაპირი რეისები დაინიშნა რომიდან და მილანიდან - ეს ყველაფერი კი ფასებს ასტაბილურებს“, - ამბობს Turebi.Ge-ს აღმასრულებელი დირექტორი.