კომპანიამ „ქართული აგროპროდუქტი“, რომელიც ცნობილია „კეთილი და პატიოსანის“ და „პოპერის“ ბრენდებით, ბაზარს კიდევ ერთი სიახლე შესთავაზა. 

AgroPurée - „ქართული აგროპროდუქტის“ შედარებით ახალი მიმართულებაა, რომელიც ჰორეკა სექტორს ხილისა და ბოსტნეულის ნატურალური, მზა პიურეებს სთავაზობს. 

როგორც Business Insider Georgia-სთან  „ქართული აგროპროდუქტის“ ერთ-ერთმა პარტნიორმა გიორგი  ახალაძემ განაცხადა, კომპანია პიურეებს დიდი ხანია აწვდიდა მსხვილ დამკვეთებს, თუმცა ახლა ჰორეკა სექტორის ათვისებაც გადაწყდა. 

„ქართული აგროპროდუქტი“ ამ მიმართულებით ბევრ კომპანიას ემსახურება. მიმართულება დიდი ხანია გვაქვს და ძირითადად პროდუქტს მსხვილი კომპანიებისთვის ვაწარმოებდით. თუმცა ახლა გვინდა, რომ ჰორეკა სექტორზე გავიდეთ და პროდუქტი აქტიურად შევთავაზოთ. ვფიქრობთ, რომ ის მომხმარებლებისთვის საცალოდაც საინტერესოა. შესაბამისად, არ გამოვრიცხავთ, რომ სუპერმარკეტებშიც ვიხილოთ. უბრალოდ ახლა ვტესტავთ, მომხმარებლების მხრიდან თუ როგორი გამოხმაურება და უკუკავშირი ექნება.

ზოგადად ჩვენ 22 დასახელების პიურეს ვაწარმოებთ და მათი წარმოება სეზონურად ხდება. ახლა, მაგალითად, ატმის გადამუშავება მიმდინარეობს“, - ამბობს გიორგი ახალაძე.

ირკვევა, რომ AgroPurée მიმართულების მთავარი სამიზნე ადგილობრივი ბაზარია, რადგანაც ექსპორტზე ქართულ კომპანიებს მოთხოვნის დაკმაყოფილების პრობლემა აქვთ. 

„ექსპორტის შემთხვევები გვქონია, მაგრამ ჩვენ არ გვაქვს იმდენი ხილის ბაზა, რომ სერიოზულ ექსპორტიორად ჩამოვყალიბდეთ. ამიტომ გათვლას ადგილობრივ მომხმარებლებზე ვაკეთებთ. რაც AgroPurée-ს მიმართულება გავააქტიურეთ ჰორეკა სექტორის მხრიდან ინტერესი და მოთხოვნა მზარდია. ჩვენ პროდუქციას ცნობილ შეფმზარეულებს ვაწვდით, რომლებმაც უკვე დატესტეს და გარკვეული შეკვეთებიც შემოვიდა“, - ამბობს „ქართული აგროპროდუქტის“ ერთ-ერთი პარტნიორი. 

ირკვევა, რომ AgroPurée-ს მიმართულება აქტიურად გამოიყენება, როგორც კულინარიაში, ასევე საინტერესოა სასმელებში. კოქტეილებისთვის ძირითადად ხილის მიმართულებაა საინტერესო, ბოსტნეულის მიმართულება კი უფრო გასტრონომიაში.

როგორც კომპანიის ვებგვერდზე განთავსებული ინფორმაციიდან ირკვევა, კომპანია „ქართული აგროპროდუქტი“ ჩამოყალიბდა 2013 წელს და გურჯაანის რაიონის სოფელ ჩუმლაყში დაიწყო საქმიანობა, როგორც ხილის გადამამუშავებელმა საწარმომ.

„ამ პერიოდში 500-ზე მეტ ადგილობრივ ფერმერთან მჭიდრო თანამშრომლობით, ჩვენ მივაწოდეთ საუკეთესო ხარისხის პროდუქტი ათამდე უმსხვილესი სუპერმარკეტების ქსელს რუსეთში, უკრაინაში, ყაზახეთსა და ბელორუსიაში.

განსაკუთრებული სიფრთხილითა და პასუხისმგებლობით ვეკიდებით ნაყოფის შერჩევის პროცესს, რათა შევუნარჩუნოთ უმაღლესი ხარისხი და დავაკმაყოფილოთ მომხმარებლის მოთხოვნები, რითაც ჩამოვყალიბდით როგორც ქართული ხილის და ბოსტნეულის ერთ ერთი წამყვანი ექპორტიორი.

ჩვენი მისიაა – ხელი შევუწყოთ საქართველოში ხილის წარმოებას, გადამუშავებას და წარმოებული პროდუქტების ექსპორტს.

აღნიშნული მისიის შესასრულებლად 2017 წლიდან კომპანიამ დაიწყო ხილის და ბოსტნეულის პიურეს და რბილობიანი წვენების წარმოება.

2020 წლიდან კეთილი და პატიოსანი ბრენდის ქვეშ ჩვენ უკვე ვახდენთ 6 დასახელების სხვადასხვა შემადგენლობის უნიკალურ სასმელის – დასალევი ხილ-ბოსტნეულის რეალიზაციას.

ჩვენი კომპანიის ძირითად საქმიანობას წარმოადგენს ქართული ხილისა და ბოსტნეულის გადამუშავება (კალიბრაცია-შენახვა-დასაწყობება სამაცივრე შენობაში) და როგორც ცოცხალი ხილის და ბოსტნეულის, ასევე მათგან უნიკალური ნატურალური სასმელის დამზადება და ექსპორტი.

ამ მიზნებისათვის კომპანიამ 2.5 ჰა საკუთარ ტერიტორიაზე შექმნა თანამედროვე გადამამუშავებელი საწარმო, რომელიც მოიცავს 430 მ2 საკონსოლიდაციო ცენტრს, 350 ტონა ტევადობის სამაცივრე მეურნეობას და თანამედროვე გადამამუშავებელ ხაზს.

ჩვენი რჩეული პროდუქციის დაზიანებისგან დასაცავად დახარისხება მიმდინარეობს თანამედროვე, იტალიური UNITEC-ის კალიბრაციისა და სორტირების დანადგარების მეშვეობით

ჩვენს საწარმოში ხილი და ბოსტნეული ინახება სასაწყობო მაცივარში, რომელშიც დაცულია ყველა სტანდარტი და უზრუნველყოფილია პროდუქციის გრძელვადიანი შენახვის პირობები.

ჩვენს კომპანიას მოპოვებული აქვს მაღალი ხარისხის ხილისა და ბოსტნეულის მიმწოდებლის სტატუსი საექსპორტო ბაზარზე.

პიურეს წარმოება ხორციელდება იტალიური TECMON-ის ფირმის პიურეს დამამზადებელი ხაზით.

საწარმოში დანერგილია სურსათის უვნებლობის მართვის სისტემა, რომელიც უზრუნველყოფს ადამიანის სიცოცხლის და ჯანმრთელობისთვის უვნებელი პროდუქციის წარმოებას ISO 22000:2018 სტანდართან შესასაბამისობაში“, - აღნიშნულია კომპანიის ვებგვერდზე განთავსებულ ინფორმაციაში.