მთაწმინდის პარკი • Mtatsminda Park-ი ზაფხულის ტურისტულ სეზონს სიახლეებით ხვდება. როგორც Business Insider Georgia-სთან მთაწმინდის პარკის საზოგადოებასთან ურთიერთობის და ღონისძიებების მენეჯერმა ეთო გიგიაძემ განაცხადა, საბაგიროსთან ერთად პარკს შეემატა სრულიად ახალი კვების სივრცე ფუდკორტი.

„მთაწმინდის პარკის ყველაზე მნიშვნელოვანი სიახლე, რუსთაველის გამზირისა და პარკის დამაკავშირებელი საბაგიროს აღდგენაა, რაც როგორც მთაწმინდის პარკისთვის, ასევე დედაქალაქისთვის ინფრასტრუქტურული განვითარების მნიშვნელობისაა.
საბაგიროსთან ერთად პარკს შეემატა სრულიად ახალი კვების სივრცე ფუდკორტი, რომელშიც გაერთიანებულია კვების რამდენიმე ობიექტი. აღსანიშნავია, რომ ფუდკორტი ძალიან დახვეწილი და კომფორტუილი გარემოა ვიზიტორებისთვის, გემრიელი კვების გარდა აქ მოსული სტუმარი შეძლებს დაისვენოს და განიტვირთოს ულამაზეს გარემოში, სუფთა ჰაერზე. მნიშვნელოვანია, რომ რუსთაველიდან ფუდკორტში მოხვედრა საბაგიროთი სულ რაღაც 4-5 წუთშია შესაძლებელი“, - აცხადებს ეთო გიგიაძე.

მისივე თქმით, წელს საოჯახო ზონაში არსებულ ატრაქციონებს შეემატა ძალიან საინტერესო სივრცე - თოკების ქალაქი, რომელიც თავგადასავლების მოყვარულებისთვის განსაკუთრებით საინტერესოა.
აღსანიშნავია, რომ მთაწმინდის პარკი ფუნქციონირებს ყოველდღე და მოიცავს სამ ზონას: საბავშვო, საოჯახო და ექსტრემალური. რაც თავის მხრივ გულისხმობს იმას, რომ ნებისმიერი ასაკის ვიზიტორი შეძლებს გაერთოს და ემოციებით სავსე დღე მოიწყოს.

ასევე, აღსანიშნავია ის ფაქტი, რომ მთაწმინდის პარკი მასშტაბური ღონისძიებების და ფესტივალების იდეალური სივრცეა და მიმდინარე სეზონზე აქ უკვე გაიმართა ისეთი ღონისძიებები, როგორიცაა ღვინის, ცქრიალა ღვინის და ყველის ფესტივალები. ასევე, მასშტაბურად აღინიშნა 1 ივნისი.
ცნობისათვის, 13 ივლისს მთაწმინდის პარკი უმნიშვნელოვანეს ღონისძიებას, ნაყინის ფესტივალს უმასპინძლებს, ხოლო 18,19 და 20 ივლისს კი ლუდის ფესტივალს.

მომდევნო პერიოდებშიც დაგეგმილია სხვადასხვა სახის ღონისძიებები, რომლის შესახებ ინფორმაციის მოძიება ვიზიტორებს შეუძლიათ პარკის სოციალურ ქსელებში.

https://www.facebook.com/Mtatsminda.Park

https://www.instagram.com/mtatsmindapark/