იუსტიციის სახლი ბიზნესს სპეციალურ მომსახურების პაკეტებს სთავაზობს. როგორც ტელეკომპანია „მაესტროს“ ეთერში გადაცემა Business Insider Georgia-ში ​სტუმრობისას იუსტიციის სახლის თავმჯდომარემ ვახტანგ ჟვანიამ აღნიშნა, სტარტაპებისთვის გათვალისწინებულია სამთვიანი პაკეტი, უფრო ხანგრძლივი ექვსთვიანი პაკეტი უკვე განვითარების პროცესში არსებულ კომპანიებს შეესაბამება, ხოლო ერთწლიანი პაკეტი მოიცავს ადგილზე გასვლის სერვისს, რაც ბიზნესს კომფორტულ გარემოში სთავაზობს ყველა აუცილებელ სერვისს, მათ შორის საჯარო რეესტრის მიმართულებით.

„როცა ვსაუბრობთ ბიზნესასისტენტის პროექტზე და იმ პაკეტებზე, რომელსაც ჩვენ ბიზნესს ვთავაზობთ, აქ რამდენიმე მიმართულება ჩამოგვიყალიბდა. და ეს მიმართულებები ჩამოყალიბდა მხოლოდ და მხოლოდ ბიზნესის საჭიროებებიდან გამომდინარე. ბიზნესს, რომელიც ახლა იწყებს ოპერირებას, მას შეუძლია თუნდაც აიღოს სამთვიანი პაკეტი, დაასრულოს ყველა ის ძირითადი ოპერაცია, რომელიც სტარტაპისთვის არის საჭირო და მერე დამოუკიდებლად გააგრძელოს ოპერირება, იმიტომ რომ ბიზნესს თავისუფლად შეუძლია ისარგებლოს იუსტიციის სახლებით და იქ მიიღოს ყველა სერვისი. ასევე არსებობს ექვსთვიანი პაკეტი ბიზნესისთვის, რომელიც შედარებით უფრო ხანგრძლივია, ბევრად უფრო დატვირთულია იმ აქტივობებით, რომელსაც სთავაზობს მას იუსტიციის სახლი. და ყველაზე ისეთი მსხვილი პაკეტი, რომელსაც ჩვენ ვთავაზობთ ბიზნესს, ეს არის ერთწლიანი პაკეტი, რომელიც თავის თავში აერთიანებს თუნდაც ისეთ მომსახურეობას, როგორიც არის ადგილზე გასვლის მომსახურეობა. ანუ ბიზნესს არ სჭირდება იუსტიციის სახლში შესაბამის სივრცეში მოსვლა, მას შეუძლია თავისი ასე ვთქვათ ასისტენტი, რომელიც მასზეა მიმაგრებული დაიბაროს თავისთან ოფისში და იქ გააკეთოს განაცხადი. ასე რომ, ამ პროექტის და ამ პაკეტების არსებობის მთავარი მიზანი გახლავთ ის, რომ ჩვენ მაქსიმალურად კომფორტულ გარემოში ვამყოფოთ ბიზნესი, იმიტომ რომ სერვისი, რომელიც დაკავშირებულია თუნდაც საჯარო რეესტრის მიმართულებასთან, მათთვის სასიცოცხლოდ მნიშვნელოვანია და ბუნებრივია ამ სერვისებზე წვდომა და მარტივი წვდომა ბუნებრივია ბიზნესს ხელს უწყობს განვითარებაში“, - აცხადებს იუსტიციის სახლის თავმჯდომარე.