მეღვინეობა George Grey Winery-ს გაყიდვები საექსპორტო ბაზრებზე 10-15%-იან ზრდას აჩვენებს. ამის შესახებ Business Insider Georgia-სთან George Grey Winery-ს დამფუძნებელმა და კომერციულმა დირექტორმა, გიორგი რუხაძემ განაცხადა.

„მიმდინარე წელს ყურძნის გადამუშავების კუთხით ზრდა არ გვქონია - რა მოცულობებიც შარშან გადავამუშავეთ, იგივე იყო წელსაც. საუბარია 50 ათასი ბოთლი ღვინის შესაბამისი ყურძნის გადამუშავებაზე. რაც შეეხება ზრდას, იქიდან გამომდინარე, რომ წინა წელი ცოტა შეფერხებები იყო, მოხდა კარგი ამბებიც -ის, რომ საექსპორტო ბაზრებზე, ჩინეთში, მოხდა განმეორებითი პარტიის გაგზავნა, რითაც ამ ბაზარზე რაოდენობრივი ზრდა გვქონდა. ასევე შევედით ავსტრიის ბაზარზე - ვენაში, ჰორეკა სექტორში, დაიწყო ჩვენი ღვინისა და ლიქიორის გაყიდვა, რაც ძალიან კარგი და საამაყო ფაქტია. ასევე George Grey Winery-ის პროდუქცია, ომის მიუხედავად, უკრაინაში გავიდა ექსპორტზე - პროდუქცია უკვე სამჯერ გადავზიდეთ, რაც იმის დასტურია, რომ მოთხოვნა პროდუქტზე მზარდია.

საექსპორტო ბაზრებზე წელს 10-15%-იანი ზრდა გვიფიქსირდება. საექსპორტო ბაზრებზე რომ ზრდაა, ეს უკვე კარგია. გასათვალისწინებელია ის ფაქტი, რომ George Grey Winery ყოფილი დსთ-ს ქვეყნებში ექსპორტზე მხოლოდ უკრაინაში გადის, რაც იმას ნიშნავს, რომ ჩვენი საექსპორტო ბაზარი დასავლურია. ასევე, ჩინეთი და იაპონია“, - აცხადებს გიორგი რუხაძე.

2026 წლისთვის George Grey Winery აშშ-ის ბაზარზე გეგმავს საექსპორტო არეალის გაფართოებას.

„2026 წლისთვის ჩვენი სტრატეგიული საექსპორტო ბაზარი არის აშშ. აქტიურად მიმდინარეობს მოლაპარაკებები აშშ-ის ერთ-ერთ შტატთან. აშშ-ის ბაზარზე თითოეულ შტატს აქვს თავისი ინდივიდუალური კანონმდებლობა, წესები და მიდგომები ღვინის იმპორტთან და რეალიზაციასთან დაკავშირებით. ჩვენ უკვე წარმოდგენილები ვართ და ჩვენს პროდუქციას ვყიდით ფლორიდის შტატში, და ახლა უკვე ორ პარალელურ შტატთან გვაქვს მოლაპარაკება. იმედი მაქვს, რომ წლის ბოლომდე - ერთი თვეა დარჩენილი - ამ ერთ თვეში ამ მოლაპარაკებებს წარმატებით დავხურავთ. ყოველ შემთხვევაში, მომავალი წლის გაზაფხულზე გვინდა, რომ ჩვენი ღვინოები ამ ორ შტატშიც იყოს წარმოდგენილი“, - განმარტავს George Grey Winery-ის დამფუძნებელი.

George Grey Winery ამ დროისთვის 12 სახეობის ღვინოს და ასევე რამდენიმე სახეობის ლიქიორს აწარმოებს. კომპანიის ასორტიმენტი მოიცავს ფერად ღვინოებსაც, რომელზედაც დიდი ინტერესია.

„ფერების კუთხით მართლაც მრავალფეროვანი არჩევანი გვაქვს. ფერების კუთხით ჩვენს მიერ წარმოებული ღვინოები ყოველწლიურად უფრო და უფრო იხვეწება და ბევრად უკეთესი გემოვნური თვისებები აქვს. თუმცა ფერებში რაღაც დონეზე შეზღუდვა არსებობს - იქიდან გამომდინარე, რომ ლურჯი ფერი ამ ეტაპზე შეგვიძლია მივიღოთ ბუნებრივად, ხოლო აქედან ხდება შემდეგ სხვადასხვა ფერის ღვინის დამზადება - იქნება ეს იასამნისფერი, მწვანე თუ ვარდისფერი.

ზოგადად, 12 სახეობის ღვინოს აწარმოებს George Grey Winery. დამეთანხმებით, რომ 12 სახეობა ბევრი არ არის, მაგრამ მცირე მეურნეობისთვის არც ისე ცოტაა.

ჩვენს პორტფელში ყველაზე გაყიდვადი არის *Greyseuli*, ხოლო ფერად ღვინოებში ყველაზე გაყიდვადი არის ცისფერი ღვინო, ხოლო ლიქიორების კატეგორიაში - საფერავის ლიქიორი“, - ამბობს რუხაძე.

კომპანიის პროდუქციის 70%-ზე მეტი საექსპორტო ბაზრებში იყიდება.

„ჩვენი გაყიდვების 70-80% ექსპორტზე მოდის და გვირჩევენ, რომ ეს პროცენტული მაჩვენებლები შევინარჩუნოთ, იქიდან გამომდინარე, რომ ექსპორტი კომპანიისთვის ბევრად უფრო მომგებიანია, ვიდრე ადგილობრივ ბაზარზე გაყიდვა. ადგილობრივ ბაზარს რაც შეეხება, ჩვენ ვთანამშრომლობთ „ალკორიუმთან“ და „8000 მოსავალთან“, რომლებიც არიან ჩვენთვის „პატიოსანი“ პარტნიორები. კიდევ არის რამდენიმე კომპანია, რომლებთანაც სიამოვნებით ვთანამშრომლობთ, მაგრამ უმრავლესობასთან რთულია ურთიერთობა, იქიდან გამომდინარე, რომ ღვინის რეალიზაციას ახდენენ და დროულად ფულს არ იხდიან, და არის მუდმივი ჭიდაობა, რომ ფული დაგვიბრუნონ“, - განმარტავს კომპანიის დამფუძნებელი.

George Grey Winery-ს მეღვინეობის ისტორია იწყება რამდენიმე ათეული წლის წინ, ისტორიულ სოფელ წილკანში. ამ რეგიონში ღვინის წარმოება დაახლოებით 1400 წლის წინ დაიწყო. წინაპრებისგან მემკვიდრეობით მიღებული ისტორიული ტრადიციებით და გამოცდილებით შეიქმნა ღვინის დაყენების ახალი კონცეფცია, რომელიც ღვინის მოყვარულებს პრემიუმ ხარისხის ქართულ ტრადიციულ ღვინოებს სთავაზობს.