„დორა“ არის ქართული ჯოხიანი კანფეტების მწარმოებელი კომპანია, რომელიც 2017 წელს, 9 წლის ასაკში დავიწყე, როგორც ჰობი და საინტერესო ექსპერიმენტი, - განაცხადა Business Insider Georgia - სთან კომპანიის დამფუძნებელმა გიორგი შეშაბერიძემ.

მისივე თქმით, წლების განმავლობაში „დორა“ პატარა სამზარეულოდან გადაიზარდა რეალურ საწარმოო პროცესში, რომელმაც მრავალი მომხმარებლის სიყვარული მოიპოვა.

„მიმდინარე ასორტიმენტი მრავალფეროვანია. ,,დორა,, ამზადებს ნებისმიერი სირთულის ჯოხიან კანფეტს როგორიც არის ფოტო კანფეტი, გამომშრალი ხილით, ღვინის კანფეტი და სხვა მრავალი სახის “, - განმარტავს კომპანიის დამფუძნებელი.

კომპანიის მთავარი კონკურენტული უპირატესობა პროდუქციის ქიმიური დანამატების გარეშე წარმოებაა.

„კომპანიის უპირატესობა არის ის, რომ ტკბილეული მზადდება ქიმიური დანამატების გარეშე ძველი ტრადიციული ,,მამალოს“ დამზადების მეთოდით, ასევე ის რომ კანფეტის სირთულე, „დორაში“ არ არსებობს და რაც ყველაზე მნიშვნელოვანია, თითოეული კანფეტი მზადდება ხელით, ამიტომ მასში ჩაქსოვილია ძველი მამალოს სპეციფიკა, რაც ნოსტალგიურია იმ ადამიანებისთვის რომლებიც ძველად სახლში საკუთარი ხელით ამზადებდნენ მამალოს და ასევე ახალი თაობისთვის, რომლებიც ბაზარზე არსებული ჯოხიანი კანფეტებისგან განსხვავებულ მეტად ნატურალურ, სახალისო, გემრიელ და ქართულ პროდუქტს იღებენ “, - აღნიშნავს გიორგი შეშაბერიძე.

„დორას“ მთავარი მიზანი საერთაშორისო დონეზე ცნობადობის გაზრდა და აღიარებაა.

„ჩვენი მთავარი მიზანია, რომ საქართველოში წარმოებული მამალო გახდეს მსოფლიო მასშტაბის წარმატებული ბრენდი „“, - ამბობს კომპანიის დამფუძნებელი.

ცნობისთვის, პროდუქციის შეძენა შესაძლებელია ისეთ ობიექტებში როგორიცაა : Wendy’s, Dunkin’ და სხვა.