„ნიადაგი“, წამყვანი აგრო-საკონსულტაციო კომპანიაა, რომელიც 2020 წლიდან ხელს უწყობს ქართული სოფლის მეურნეობის განვითარებას. Business Insider Georgia 2025 წლის შედეგებსა და 2026 წლის გეგმებზე კომპანიის მარკეტინგის ხელმძღვანელს, სალომე დიდებაშვილს ესაუბრა.

- როგორ აფასებთ 2025 წელს?

2025 წელი ჩვენი კომპანიისთვის გარდამტეხი ეტაპი იყო. წელი სტრატეგიულად მნიშვნელოვანი სიახლეებით დავიწყეთ და განვახორციელეთ რებრენდინგი, რომელმაც გააფართოვა ჩვენი ხედვა და ოპერაციული მიდგომა. თავდაპირველად „ნიადაგი“ პოზიციონირებული იყო, როგორც მოცვის კულტურაზე ფოკუსირებული ნიშური კომპანია, თუმცა პრაქტიკამ და ბაზრის ანალიზმა გვაჩვენა, რომ როგორც საქართველოში, ისე საერთაშორისო დონეზე, მოთხოვნა გაცილებით უფრო მრავალფეროვანია. ფერმერებსა და ინვესტორებს სჭირდებათ პარტნიორი, რომელიც არა მხოლოდ ერთ კულტურაზეა კონცენტრირებული, არამედ აგრარული საქმიანობის სრულ ციკლს ფარავს - დაგეგმვიდან ექსპორტამდე. სწორედ ამ რეალობამ გვიბიძგა პროფილის გაფართოებისკენ და დღეს უკვე ვმუშაობთ კენკროვან, კაკლოვან და კურკოვან კულტურებზე.

- როგორია 2026 წლის გეგმები?

2025 წელს შექმნილი ძლიერი პარტნიორული ქსელი გვაძლევს შესაძლებლობას, 2026 წელს კიდევ უფრო მასშტაბურად ვიმოქმედოთ და წარმატებით დავასრულოთ პროექტები, რომლისთვისაც ნიადაგი წელს მოვამზადეთ. რაც შეეხება 2026 წლის მიზანს - წინა წლებში ჩვენი სტრატეგია საერთაშორისო ბაზარზე ღირსეული ადგილის მოპოვება იყო, ხოლო დღეს ვთვლით, რომ ნიადაგმა ეს პოზიცია უკვე წარმატებით დაიკავა. სწორედ ამიტომ მომავალი წლის მთავარი ამოცანა ამ პოზიციის გამყარება და სტაბილიზაცია იქნება, რათა ნიადაგი კვლავ დარჩეს საერთაშორისო ბაზარზე, როგორც თანამედროვე და სანდო აგროპარტნიორი.