Bogveli ქუდებისა და კლასიკური სტილის სამოსის მწარმოებელი კომპანიაა. Business Insider Georgia- კომპანიის თანადამფუძნებელს, გიორგი ბოგველს, 2025 წლის შედეგებსა და სამომავლო გეგმებზე ესაუბრა.

ბოლო პერიოდში კომპანიამ აქტიურად დაიწყო ექსპორტის მიმართულებით მუშაობა და ახალი ბაზრების ათვისება. 2025 წელი ამ მხრივ მნიშვნელოვანი აღმოჩნდა. გვქონდა რამდენიმე შეხვედრა საზღვარგარეთ და მოლაპარაკებები ფინალურ ეტაპზე გადავიდა, რაც ჩვენი ბრენდის უცხოურ ბაზრებზე რეალიზების რეალურ შესაძლებლობას ქმნის. საერთო ჯამში, წელი შედეგიანი იყო, თუმცა მომავალში უფრო ინტენსიურ მუშაობას ვგეგმავთ და გვჯერა, რომ 2026 წელი კიდევ უფრო წარმატებული იქნება.

ვგეგმავდით ადგილობრივ ბაზარზე სტენდებისა და შოურუმების გახსნას, თუმცა აღნიშნული საკითხი მომავლისთვის გადავდეთ. ეს გადაწყვეტილება განპირობებულია იმით, რომ ამჟამად პრიორიტეტს ექსპორტს ვანიჭებთ და ჩვენი რესურსები სწორედ ამ მიმართულებაზეა კონცენტრირებული, გაყიდვების ზრდის მიზნით.

ადგილობრივი ბაზარი მოცულობით მცირეა, თუმცა, რადგან წარმოება საქართველოში ხდება, მნიშვნელოვანია, ბრენდი აქაც იყოს წარმოდგენილი და ადგილობრივ მომხმარებელს ჰქონდეს მისი გაცნობის შესაძლებლობა.

რაც შეეხება გეგმებს, თებერვალში ვგეგმავთ კიდევ ერთ ვიზიტს შვედეთში. ჩვენი ერთ-ერთი მიზნობრივი ბაზარი არის სკანდინავიური ქვეყნები, და იმედს ვიტოვებთ, რომ ამჯერად შევძლებთ საბოლოო ხელშეკრულების გაფორმებას ჩვენი ბრენდის რეალიზებისთვის მათ ბაზარზე.

მეორე მიმართულება, რომლის განვითარებაზეც ვფიქრობთ, არის ინგლისის ბაზარი. ჩვენი პროდუქცია ძირითადად ძველი ბრიტანულ-ამერიკული სტილისაა, ამიტომ თავიდან ვიკავებდით ინგლისში შესვლისგან, რადგან ადგილობრივი პროდუქცია საკმაოდ ფართოდ არის წარმოდგენილი. მოგვიანებით ჩავატარეთ კვლევა და გვქონდა რამდენიმე შეხვედრა ექსპერტებთან, რომლებმაც გვირჩიეს, რომ გვეცადა ჩვენი პროდუქციის წარდგენა ინგლისის გამოფენაზე. გვსურს გაზაფხულისთვის მონაწილეობა მივიღოთ გამოფენაში, ისე როგორც პარიზში, საფრანგეთში, რაც ჩვენთვის ნაყოფიერი აღმოჩნდა.

2026 წელს ჩვენი ორი მთავარი პრიორიტეტი იქნება: სკანდინავიური ქვეყნები, პირველ რიგში შვედეთის ბაზარი, და ბრიტანეთი, სადაც გვსურს საფუძველი ჩავუყაროთ ჩვენი პროდუქციის რეალიზებას “, - აცხადებს გიორგი ბოგველი.