2026 წელს Kiwi Post • კივი პოსტის მომსახურების ტარიფების გადახდა კრიპტოვალუტითაც იქნება შესაძლებელი. ამის შესახებ Business Insider Georgia-სთან Kiwi Post-ის საოპერაციო მენეჯერმა, ქეთევან შანიძემ, 2026 წლის გეგმებზე საუბრისას განაცხადა. იგეგმება ასევე ახალი მიმართულებების დამატებაც.

„Kiwi Post-ის გეგმები 2026 წლისთვის საკმაოდ დატვირთულია. ფილიალების დამატება და ინოვაციური სერვისების დანერგვა გვინდა - მათ შორის საუბარია კრიპტოვალუტის დამატებაზე. ანუ ჩვენი მომხმარებელი შეძლებს ჩვენი სერვისების საფასურის გადახდას კრიპტოვალუტით. ასევე გვსურს ახალი ქვეყნის დამატება, რაზედაც დიდი ხანია ვმუშაობთ. აქტიურად ვცდილობთ, რომ ჩინეთის მიმართულებაზე ჩვენს მომხმარებლებს უკეთესი ტარიფები შევთავაზოთ - შესაძლებელია, რომ სახმელეთო გადაზიდვაც დაემატოს ჩვენს მომსახურებას. ბევრი გეგმა გვაქვს, რომლებიც უნდა განხორციელდეს. ვფიქრობთ, რომ Kiwi Post-ს აქცენტი ფილიალების გაფართოების მიმართულებით უფრო რეგიონებზე გაკეთდება“, - აღნიშნა Kiwi Post-ის საოპერაციო მენეჯერმა.

ქეთევან შანიძე Kiwi Post-ის ოპერირებას 2025 წელს დადებითად აფასებს და აცხადებს, რომ კომპანიამ 2025 წელს 30-35%-ით მეტი ამანათი მოემსახურა.

„რეალურად, 2025 წელს Kiwi Post-მა საკმაოდ ბევრი მიმართულებით იმუშავა. წელს დავამატეთ დრაივები და ორი ფილიალი: ქუთაისსა და გლდანში. ასევე დავამატეთ ახალი მიმართულება - ესპანეთი, რაც საკმაოდ პოპულარული აღმოჩნდა, რადგან საჰაერო გზით ამანათი საქართველოში 3-4 დღეში ჩნდება. ესპანეთი ბრენდების მწარმოებელი ქვეყანა არის და საბერძნეთთან შედარებით უფრო ბიუჯეტური ონლაინ შოპინგისთვის. რა თქმა უნდა, პირველივე დღიდან ესპანეთმა მომხმარებელთა დიდი ინტერესი დაიმსახურა.

2025 წელს 30-35%-ით გაიზარდა წლიურ ჭრილში ამანათების რაოდენობა, ხოლო შავი პარასკევის კვირეულის ფარგლებში 80-85%-იანი ზრდა დაფიქსირდა, ანუ მომხმარებელი საკმაოდ აქტიური იყო.

ამანათების წლიურ ზრდაში ყველაზე დიდი წილი აშშ-ს, ჩინეთისა და ბრიტანეთის მიმართულებებზე მოდის.

Kiwi Post-მა 2025 წელს Trendyol-თან ინტეგრაცია განახორციელა, სადაც მომხმარებელს შეუძლია მიუთითოს Kiwi Post-ის საქართველოს მისამართი და ამანათი პირდაპირ ჩვენს ფილიალში მოვა. მსგავსი ინტეგრაცია გვაქვს სულ სამი კომპანიასთან. მნიშვნელოვანი არის, რომ Trendyol-ს დაემატა ინგლისური ენა და პლატფორმაზე დაიდო ქართულენოვანი ბანერები, რამაც გამოიწვია მომხმარებლების დიდი ინტერესი. Trendyol-სგან მიღებული ინფორმაციით, ბოლო 2 თვეში 15-20%-იანი ზრდაა. არსებული ამანათების რაოდენობიდან გამომდინარე, მომხმარებელი Trendyol-ს საკმაოდ აქტიურად დაუბრუნდა, რადგან პლატფორმა თავის მომხმარებლებს კარგ ფასდაკლებებს სთავაზობს. ქეშბექიც ზემოქმედებს ქართველ მომხმარებელზე და აქტიურად უბრუნებს Trendyol-ს. მკვეთრი ზრდაა მოსალოდნელი თურქეთის ამანათების მიმართულებით, და მგონია, რომ 2026 წელს ეს ციფრები კიდევ უფრო გაიზრდება“, - ამბობს Kiwi Post-ის საოპერაციო დირექტორი.