ქართული გადამზიდავი კომპანია Kairos Logistics-ი აქტიურად ფართოვდება და იზრდება. როგორც Business Insider Georgia-ს კომპანიის თანადამფუძნებელმა და გენერალურმა დირექტორმა მიხეილ ნამადოვმა განუცხადა, Kairos Logistics-ი უკვე ოფიციალურად წარმოდგენილია სომხეთში და ამ ბაზარზე არსებული მოთხოვნა მოლოდინს უკვე გადააჭარბა.

„გეტყვით, რომ ჩვენ აქამდეც ვაქტიურობდით სომხეთის ბაზარზე და აქტიურად გვყავდა დამკვეთები. უბრალოდ ახლა სომხეთში ოფიციალური წარმომადგენლობა დავაფუძნეთ და დავარეგისტრირეთ შპს. ავიყვანეთ ადგილობრივი გამოცდილი კადრები და მაქსიმალურად ფოკუსი ავიღეთ სფეროს განვითარებაზე, რადგანაც ლოგისტიკურად სომხეთი მიბმულია საქართველოზე. სომხეთის ბაზარზე ჩვენს კომპანიას საკმაოდ დადებითად აღიქვამენ, სანდოობა და რეპუტაციაც მაღალი გვაქვს. სომხეთის ბაზარზე საკმაოდ სწრაფად ვითარდებით და პირველი ორი თვის შედეგებმა ჩვენს მოლოდინსაც კი გადააჭარბა“, - განაცხადა ნამადოვმა.

როგორც Kairos Logistics-ის თანადამფუძნებელი აცხადებს, სომხეთის ბაზარზე ექსპორტისა და იმპორტის კუთხით მოთხოვნა ევროპის მიმართულებებზეა.

„ძირითადი ექსპორტი, რასაც ჩვენ ვემსახურებით, ეს არის სომხეთი–ევროპის მიმართულება, ხოლო რაც შეეხება იმპორტს, აქაც ფოკუსი გვაქვს აღებული უკრაინისა და ევროპის მიმართულებაზე. ასევე ფოთიდან ტვირთების მომსახურებაზე, რადგანაც ისინი ფოთს განიხილავენ, როგორც საზღვაო არტერიას“, - განმარტავს Kairos Logistics-ის თანადამფუძნებელი.

აღსანიშნავია, რომ Kairos Logistics-ი 2013 წლიდან საერთაშორისო გადაზიდვების მიმართულებით ოპერირებს და უკვე 6 ქვეყანაში ჰყავს ოფიციალური წარმომადგენლობა: საქართველოში, უკრაინაში, ყაზახეთში, თურქეთში, აზერბაიჯანში და ახლა უკვე სომხეთშიც.

საგულისხმოა, რომ Kairos Logistics-ი არსებულ მიღწევებზე არ ჩერდება და კიდევ მორიგი გაფართოებისთვის ემზადება.

„აქტიურად ვუყურებთ უზბეკეთის მიმართულებას და სავარაუდოდ, მომავალ წელს უზბეკეთის ბაზარზე უკვე დაგეგმილად შევალთ. ეტაპობრივად ვფიქრობთ, რომ შუა დერეფნის მიმართულებაზე თითქმის ყველა ქვეყანაში ვიყოთ წარმოდგენილები - ინფრასტრუქტურულად საქართველოს გამოვიყენებთ, როგორც ჰაბს და უფრო მეტ სიახლეს შევთავაზებთ ბაზარს, როგორც სერვისების კუთხით, ისე ინფრასტრუქტურულად“, - განმარტავს მიხეილ ნამადოვი.

კომპანია Kairos Logistics ახორციელებს ნებისმიერი სირთულის გადაზიდვებს მთელი მსოფლიოს მასშტაბით. მრავალწლიანი წარმატებული მოღვაწეობის შედეგად, კომპანია მოწინავე ადგილს ინარჩუნებს ქართულ სატრანსპორტო ბაზარზე. პროფესიონალურ ლოგისტიკურ მომსახურებას სთავაზობს 200-მდე მსხვილ ქართულ და საერთაშორისო ბრენდს.

კომპანიის მისია დაარსების დღიდან უცვლელია - „პროფესიონალური ლოგისტიკური სერვისის შეთავაზებით ხელს ვუწყობთ კომპანიებს გაზარდონ წარმადობა და მუდმივად იდგნენ განვითარების გზაზე“.