2026 წელს ჩვენი სტრატეგია საერთაშორისო და რეგიონალური გაფართოებისკენ არის მიმართული , - ამის შესახებ Business Insider Georgia - ს ტურისტული კომპანია Escapers - ის გაყიდვების ხელმძღვანელმა ანი კეკელიამ განუცხადა.

„2026 წელს ჩვენი სტრატეგია საერთაშორისო და რეგიონალური გაფართოებისკენ არის მიმართული : 

• ვგეგმავთ ახალი, ნაკლებად პოპულარული მაგრამ საინტერესო ქვეყნების დამატებას ჩვენი ტურისტული და საკრუიზო პაკეტების რუკაზე მსოფლიოს მასშტაბით;

• ვაპირებთ კორპორატიული საქმიანობის გაღრმავებას, ვმუშაობთ კორპორატიული კლიენტებისთვის ისეთი სერვისების შეთავაზებაზე, რომელიც გამოგვარჩევს სხვა კომპანიებისგან, მიზანია ჩვენთან თანამშრომლობა მათთვის მეტად კომფორტული და მომგებიანი გახდეს;

• გადავამუშავებთ და სრულად განვაახლებთ ჩვენს ციფრულ პლატფორმას: მომხმარებლებს შევთავაზებთ მარტივ, სწრაფ და უსაფრთხო ონლაინ დაჯავშნას, 24/7 -ზე მხარდაჭერას.

აქტიურად გავაგრძელებთ მუშაობას B2B პარტნიორობის გაფართოებაზე, ასევე საერთაშორისო გამოფენებში მონაწილეობით ჩვენი ბრენდის პოზიციონირების გაძლიერებაზე.

კიდევ რამოდენიმე ახალი გეგმის დამუშავების პროცესში ვართ, ამ ეტაპზე დეტალების გაზიარებისგან თავს შევიკავებ, ჩვენი მოგზაურები და პარტნიორები მათ ნაბიჯ-ნაბიჯ უკვე პრაქტიკაში იხილავენ.

ქართველი მოგზაურები წლებთან ერთად უფრო მეტად ინტერესდებიან საზღვრებს გარეთ მოგზაურობით. მოგზაურობა მათ მთავარ პრიორიტეტად და განტვირთვის საუკეთესო საშუალებად ჩამოყალიბდა. ეს ტენდენცია განსაკუთრებით მახარებს, რადგან დასვენებასთან ერთად ისინი ბუნებრივად ერთვებიან შემეცნების პროცესში, ეცნობიან ახალ კულტურებს და იღებენ ისეთ დაუვიწყარ ემოციებს, რომლებიც შემდეგ ყველაზე ლამაზ და მნიშვნელოვანი მოგონებებად იქცევა.

ჩემი პროფესიული მიზანია რაც შეიძლება მეტი ადამიანი იყოს მოგზაურის ამპლუაში, რადგან მოგზაურობა ადამიანს უფრო ლოიალურს, კეთილს და თავისუფალს ხდის.

სწორედ ამისთვის არსებობს ჩვენი კომპანია, რომ ეს გამოცდილება ყველასთვის ხელმისაწვდომი და განსაკუთრებული გახდეს “, - აცხადებს ანი კეკელია.

ცნობისთვის, კომპანია 2023 წლიდან ოპერირებს ბაზარზე და მთავარი მიზანი თითოეული მომხმარებლის კეთილგანწყობა და სანდოობაა.