2026 წელს განვითარებას სამი მთავარი მიმართულებით ვგეგმავთ, - ამის შესახებ, Business Insider Georgia - ს teamtwo - Architects & Engineers - ის თანადამფუძნებელმა და არქიტექტომა შოთა საგანელიძემ განუცხადა.

„2026 წელს განვითარების სტრატეგიას სამი მთავარი მიმართულებით ვგეგმავთ. ეს მიმართულებები უკავშირდება როგორც ბაზრის მიმდინარე ტენდენციებს, ისე ჩვენი კომპანიის გრძელვადიან ხედვას.

პირველ რიგში, აქცენტს ვაკეთებთ მდგრადი არქიტექტურისა და ენერგოეფექტურობის მიმართულებით ცოდნისა და პრაქტიკული გამოცდილების კიდევ უფრო გაღრმავებაზე. აშკარაა, რომ ამ მიმართულებით მოთხოვნა მუდმივად იზრდება, ხოლო ჩვენი მიზანია ვიყოთ წამყვანი კომპანია, რომელიც დამკვეთს შესთავაზებს მაღალპროფესიონალურ, სერტიფიკაციებსა და რეალურ ეფექტურობაზე დაფუძნებულ გადაწყვეტილებებს.

მეორე მნიშვნელოვანი მიმართულებაა საერთაშორისო ბაზრებზე გასვლა. ამ კუთხით teamtwo უკვე ფლობს ამერიკის ბაზარზე მუშაობის პრაქტიკულ გამოცდილებას და კარგად იცნობს IBC (International Building Code) სტანდარტებს. პარალელურად, განსაკუთრებულ ყურადღებას ვუთმობთ ევროკოდების სიღრმისეულ შესწავლასა და პრაქტიკულ ინტეგრაციას, რაც უზრუნველყოფს ჩვენი არქიტექტურული და კონსტრუქტიული სერვისების სრულ შესაბამისობას ევროპული ბაზრების მოთხოვნებთან.

მესამე მიმართულება უკავშირდება ინდუსტრიული და მოდულარული შენობების პროექტირებას. საქართველოში ამ ტიპის პროექტებზე მოთხოვნა მზარდია: Cushman & Wakefield-ის რეგიონული კვლევების მიხედვით, ინდუსტრიულ და ლოგისტიკურ ფართებზე მოთხოვნა ბოლო წლებში წლიურად საშუალოდ 15–20%-ით იზრდება, რაც განპირობებულია წარმოების, ლოგისტიკისა და სწრაფი მშენებლობის საჭიროებით. ჩვენს გუნდს კი აქვს ინდუსტრიული და ლოგისტიკური ობიექტების პროექტირების მრავალწლიანი გამოცდილება — როგორც ტრადიციული, ასევე მოდულარული სამშენებლო სისტემების გამოყენებით, სხვადასხვა მასშტაბისა და სირთულის პროექტებზე.

ამ სამ მიმართულებაზე კონცენტრაციით 2026 წელს teamtwo გეგმავს არა მხოლოდ სერვისების გაფართოებას, არამედ პოზიციონირების გაძლიერებას, როგორც თანამედროვე, საერთაშორისო სტანდარტებზე დაფუძნებული საპროექტო კომპანიის “, - აცხადებს შოთა საგანელიძე.