„ვაზიანი კომპანიმ“ მონაწილეობა მიიღო სამხრეთ კორეის ქალაქ დეჯონში გამართულ Daejeon International Wine EXPO-ს მასშტაბურ გამოფენაში , - ამის შესახებ Business Insider Georgia - ს კომპანიის გაყიდვებისა და მარკეტინგის უფროსმა აურიკა კროიტორმა განუცხადა.

„2025 წლის ოქტომბერში „ვაზიანი კომპანიმ“ მონაწილეობა მიიღო სამხრეთ კორეის, ქალაქ დეჯონში გამართულ Daejeon International Wine EXPO-ს მასშტაბურ გამოფენაში. ღონისძიებაზე, რომელიც აერთიანებს ღვინის სფეროს პროფესიონალებს, ბაიერებს და ღვინის მოყვარულებს მთელი მსოფლიოს მასშტაბით, ვაზიანი კომპანიმ წარადგინა როგორც კლასიკური, ასევე ტრადიციული ქვევრის მეთოდით დაყენებული ღვინოები. გარდა ამისა, დავარეგისტრირეთ ჩვენი ღვინოები კონკურსზე, რომელიც მანამდე გაიმართა და მივიღეთ ოთხი ოქროს მედალი, რაც მართლაც შესანიშნავი შედეგია.

აღსანიშნავია, რომ სამხრეთ კორეის ბაზარი ახალ ბაზარს წარმოადგენს. ქართული ღვინო მათთვის ჯერ კიდევ ეგზოტიკად ითვლება, თუმცა ინტერესის ზრდა შესამჩნევია, რაც დადებითი ნიშანია. განსაკუთრებით მაშინ, როდესაც მსოფლიოში, მათ შორის კორეაშიც, ღვინის მოხმარებისა და ექსპორტის შემცირების ტენდენცია შეინიშნება, ქართულ ღვინოზე მოთხოვნა იზრდება. კორეის ბაზარი მიჩვეულია მაღალი ხარისხის მშრალ ღვინოებს ისეთი ტრადიციული მწარმოებელი ქვეყნებიდან, როგორიცაა საფრანგეთი, ესპანეთი და იტალია. თუმცა, სწორედ ამ ბაზრებიდან იმპორტირებული ღვინოების გაყიდვებისა და მოხმარების მაჩვენებლები მცირდება.

2025 წელი ჯერ არ დასრულებულა, თუმცა უკვე შეინიშნება პოზიტიური ტენდენცია, ფიქსირდება ზრდა. 2024 წელსაც დაფიქსირდა რეალური ზრდა: მოცულობის მხრივ დაახლოებით 11%-ით, ხოლო თანხობრივი მაჩვენებლით ოდნავ უფრო მეტი. ეს ფაქტორი საქართველოს ერთ-ერთ იმ იშვიათ ქვეყანად აქცევს, სადაც ზრდა შეინიშნება საერთო გლობალური კლების ფონზე, რაც ძალიან კარგი შედეგია და რა თქმა უნდა, დიდი მოტივაციაა ჩვენი გუნდისთვის.

ვგეგმავთ, კიდევ უფრო აქტიურად შევიდეთ კორეის ბაზარზე, გავზარდოთ ცნობადობა და რაც შეიძლება მეტ მომხმარებელს გავაცნოთ ქართული ღვინო. ამისთვის, აუცილებელია უფრო მეტი ძალისხმევა და აქტიურობა როგორც კორეაში, ისე სხვა ბაზრებზეც. საერთო კლების ფონზე ზრდის ტენდენცია განსაკუთრებულად შთამაგონებელია და გვაძლევს სტიმულს, რომ კიდევ უკეთ წარმოვაჩინოთ ქართული ღვინო საერთაშორისო ბაზარზე “, - ამბობს კომპანიის გაყიდვებისა და მარკეტინგის უფროსი.