იურიდიულმა კომპანია „ბი ვი ქონსალთინგმა“ საქართველოს ბაზარზე ოპერირება 2021 წელს დაიწყო და დღემდე წარმატებით ახორციელებს საქმიანობას. 2025 წელს კომპანიის საქმიანობის შედეგებსა და სამომავლო გეგმებზე Business Insider Georgia-ს კომპანიის მმართველი პარტნიორი, ვახტანგ შურღაია ესაუბრა.

როგორ შეაფასებდით BV Consulting-ის საქმიანობას 2025 წელს? რომელ პროექტებსა და მიმართულებებს მიიჩნევთ ყველაზე წარმატებულად?

2025 წელს ეკონომიკური და ბიზნეს გარემოს გამოწვევების ფონზე იურიდიული მხარდაჭერის საჭიროება გაიზარდა. ბი ვი ქონსალთინგმა მიმდინარე წლის განმავლობაში მნიშვნელოვანი პროგრესი შეინიშნა. ჩვენი საქმიანობის მთავარი მიმართულებები კვლავ ნარჩუნდება და მკვეთრად იზრდება მოთხოვნა ისეთ სფეროებზე, როგორიცაა: კონკურენციის სამართალი, სახელმწიფო შესყიდვები, სამეწარმეო სამართალი და ა.შ.

2025 წლის განმავლობაში კომპანიამ არაერთი საქმე წარმატებით დაასრულა, ასევე, გაუწია მნიშვნელოვანი სამართლებრივი მხარდაჭერა პარტნიორ კომპანიებს ამ და სხვა სფეროებში სამართლებრივი შესაბამისობის უზრუნველსაყოფად. ჩვენ ვთანამშრომლობთ რამდენიმე მსხვილ ბიზნეს სუბიექტთან, რომლებსაც ვუწევთ აუთსორს მომსახურებას. ასევე აქტიურად წარმოვადგენთ ბიზნესს, როგორც სახელმწიფო უწყებებთან, ისე - სასამართლო პროცესებზე.

როგორია BV Consulting-ის დაკვირვება, როგორ შეიცვალა კლიენტების მოთხოვნები 2025 წელს, რომელ მიმართულებებში გაიზარდა მოთხოვნა და სად შემცირდა?

ჩვენი დაკვირვებით, 2025 წელს განსაკუთრებით აქტუალური გახდა კომპანიებისთვის საგადასახადო რისკების მართვა და შესაბამისობის უზრუნველყოფა. ბოლო წლის განმავლობაში ბი ვი ქონსალთინგმა არაერთ კომპანიას გაუწია საგადასახადო სამართლის მიმართულებით მომსახურება, მათ შორის, ვაწარმოებთ რამდენიმე სასამართლო დავას. ამასთან, კონკურენციის სამართლის მიმართულებით მკვეთრად გაიზარდა მოთხოვნა, განსაკუთრებით იმ კომპანიების მხრიდან, რომლებიც უკვე აღმოჩნდნენ სამართლებრივი რისკების წინაშე.

ყველაზე ხშირად ჩვენი იურიდიული მხარდაჭერა ესაჭიროებათ საშუალო და მსხვილ ბიზნესს. განსაკუთრებული აქტიურობა შეინიშნება ფარმაცევტული, სადაზღვევო და სხვა სექტორებიდან, რომლებიც საქმიანობენ რეგულირებულ სფეროებში. კლიენტები ასევე ხშირად მიმართავენ სერვისებს სახელმწიფო შესყიდვებთან დაკავშირებული სამართლებრივი დახმარებისთვის და სამეწარმეო ურთიერთობებიდან გამომდინარე საკითხებზე კონსულტაციისათვის.

ფინანსური და ბიზნეს კონსულტაციების სეგმენტში კონკურენცია იზრდება. რა სტრატეგიებით მოახერხეთ ბაზარზე პოზიციების განმტკიცება?

მიუხედავად მზარდი კონკურენციისა, ბი ვი ქონსალთინგი მუდმივად ინარჩუნებს საკუთარ პოზიციას. კომპანიის მიერ წარმოებული საქმეების წარმატების მაჩვენებელი ადასტურებს ჩვენი გუნდის პრაქტიკულ გამოცდილებასა და სტრატეგიულ ხედვას. ბი ვი ქონსალთინგის კონკურენტულ უპირატესობას ბაზარზე მაღალი ხარისხის მომსახურება წარმოადგენს, განსაკუთრებით ისეთ სექტორებში, სადაც სამართლებრივი და კომერციული ინტერესები იკვეთება. ბი ვი ქონსალთინგი მუდმივად უზრუნველყოფს თავის კლიენტებთან მჭიდრო თანამშრომლობას ხარისხიანი და ადაპტირებული სერვისების მიწოდების მიზნით.

რა არის BV Consulting-ის 2026 წლის ძირითადი სტრატეგიული პრიორიტეტები?

ბი ვი ქონსალთინგის სტრატეგიულ პრიორიტეტებში 2026 წლისთვის წამყვან ადგილს იკავებს იურიდიული სერვისების დივერსიფიკაცია. ახალი სერვისები, ხელოვნური ინტელექტის დანერგვა კლიენტის გამოცდილების გასაუმჯობესებლად, კომპანიის სტრატეგიულ პარტნიორთა ოდენობის ზრდა და ბაზრის ახალი სეგმენტების ათვისება დაეხმარება კომპანიას ბაზარზე საკუთარი პოზიციის განმტკიცებასა და მომსახურების გაუმჯობესებაში.