შრომის სამართლის განვითარება საქართველოში: მთავარი სიახლეები და სასარგებლო რჩევები

ბიზნეს მრჩეველი

რჩევები ბიზნესს - რა უნდა გავითვალისწინოთ სესხის აღებისას

28.05.2025.00:44

ბიზნესის გაფართოვება ან ახალი საქმიანობის დაწყება ხშირად დამატებითი ფინანსური რესურსების მოძიებას მოითხოვს. ბიზნეს-სესხი, როგორც მნიშვნელოვანი ფინანსური ინსტრუმენტი, მეწარმეებს ეხმარება საჭირო ინვესტიციების განხორციელებაში. თუმცა, საფინანსო პროდუქტის წარმატებით მისაღებად აუცილებელია კონკრეტული მოთხოვნების დაკმაყოფილება და შესაბამისი დოკუმენტების სწორად მომზადება. „ბიზნეს მრჩეველის“ რუბრიკაში ბი ვი ქონსალთინგის მმართველი პარტნიორი ვახტანგ შურღაია გვიზიარებს რჩევებს ამ საკითხებთან დაკავშირებით.

საბანკო დაწესებულებები ვალდებულნი არიან, პასუხისმგებლიანი დაკრედიტების პრინციპით იხელმძღვანელონ, რაც ნიშნავს, რომ ისინი დეტალურად აფასებენ მსესხებლის ფინანსურ მდგომარეობას. ეს პროცესი მოიცავს შემოსავლების, ხარჯებისა და არსებული ვალდებულებების სრულ ანალიზს. ამისთვის, როგორც ფიზიკურმა პირებმა, ისე - მეწარმე იურიდიულმა პირებმა უნდა წარმოადგინონ შემდეგი დოკუმენტები:

განაცხადი – ოფიციალური მოთხოვნა ფინანსური მომსახურების მიღების თაობაზე;
სადამფუძნებლო დოკუმენტაცია - წესდება, სადამფუძნებლო შეთანხმება, ამონაწერი სამეწარმეო რეესტრიდან, ხელმძღვანელობაზე უფლებამოსილი პირის საიდენტიფიკაციო დოკუმენტი;
ფინანსური ანგარიშგება - იურიდიული პირების შემთხვევაში - საბალანსო, მოგება-ზარალისა და ფულის მიმოქცევის უწყისები, ხოლო ფიზიკური პირებისთვის - საბანკო ამონაწერი და ცნობა შემოსავლების სამსახურიდან;
ბიზნეს-გეგმა – ბიზნესის საქმიანობის, მიზნების, სტრატეგიის, სამომავლო გეგმებისა და ფინანსური პროგნოზების ამსახველი დოკუმენტი;
უზრუნველყოფის დოკუმენტები – უძრავი/მოძრავი ქონების ან სხვა აქტივების შეფასების აქტები და საკუთრების დამადასტურებელი დოკუმენტაცია;

გარდა ამისა, მეწარმე ფიზიკურმა პირებმა შესაძლოა წარმოადგინონ დამატებითი დოკუმენტები, რომლებიც ადასტურებს მათ საქმიანობას და შესაბამის შემოსავალს, მათ შორის:

საქმიანობის ადგილზე ვიზიტისა და შემოსავლების შეფასების აქტები;
ბაზრის საშუალო შემოსავლის გათვალისწინებით შედგენილი შეფასებები;
საქმიანობის დამადასტურებელი დოკუმენტები (ლიცენზია, სერტიფიკატი, დიპლომი და სხვა).

საბანკო დაწესებულება დეტალურად აფასებს ზემოხსენებულ ინფორმაციას და იღებს გადაწყვეტილებას მხოლოდ მსესხებლის გადახდისუნარიანობის სრული ანალიზის საფუძველზე, კერძოდ - პირის შემოსავლების, ხარჯებისა და ჯამური ვალდებულებების დეტალური ანალიზის, მიღებული ინფორმაციის სისწორის გადამოწმებისა და მსესხებლის/თანამსესხებლის საკრედიტო ისტორიის შემოწმების შედეგად.

ბიზნეს-სესხის გაცემისას საბანკო დაწესებულება იურიდიულ პირს უხსნის საკრედიტო ხაზს (გენერალური ხელშეკრულება), რითაც კლიენტს უდასტურებს თანამშრომლობის სურვილს, ადგენს კლიენტის საკრედიტო ლიმიტის თანხასა და მაქსიმალურ განაკვეთებს (წლიური პროცენტის, პირგასამტეხლოს და სხვ. გადასახადების სახით). შესაბამისი გირავნობის, იპოთეკის, თავდებობის და სხვა უზრუნველყოფის ხელშეკრულებები, როგორც წესი, საკრედიტო ხაზის გახსნის პარალელურად ფორმდება. ამდენად, საბანკო დაწესებულება წინასწარ უზრუნველყოფს მომავალ კრედიტებს, ხოლო კლიენტს საჭიროების შემთხვევაში სწრაფად და მარტივად შეუძლია სასურველი თანხის მიღება შესაბამისი საკრედიტო ხელშეკრულების გაფორმების საფუძველზე.

ბიზნეს-სესხის წარმატებით მისაღებად მნიშვნელოვანია ყველა ზემოხსენებული დოკუმენტის სრულყოფილად წარდგენა, რაც გაამარტივებს ფინანსური რესურსების მოპოვების პროცესს.