საქართველოში მეწარმეთა შესახებ ახალი კანონის ამოქმედებასთან ერთად დამკვიდრდა სტანდარტული წესდების ინსტიტუტი. სიახლე მიზნად ისახავდა კომპანიის რეგისტრაციის პროცესის გამარტივებას. თუმცა, მარტივად ხელმისაწვდომ სტანდარტულ წესდებასთან ერთად, კომპანიებისთვის უცვლელად აქტუალურია ინდივიდუალური წესდების შედგენა, განსაკუთრებით იმ შემთხვევაში, როდესაც ბიზნესის სპეციფიკა მოითხოვს მოქნილ და ზუსტ სამართლებრივ ჩარჩოს. იურიდიული ფირმა ბი ვი ქონსალთინგის მმართველი პარტნიორი ვახტანგ შურღაია გვიზიარებს რჩევებს, თუ რატომ უნდა მიანიჭოს ბიზნესმა უპირატესობა ინდივიდუალურ მიდგომას. 

რას გულისხმობს სტანდარტული წესდება?

სტანდარტული წესდება წარმოადგენს წინასწარ განსაზღვრულ შაბლონს, რომელიც დამტკიცებულია იუსტიციის მინისტრის მიერ. იგი ხელმისაწვდომია საჯარო რეესტრის ეროვნული სააგენტოს ვებ-გვერდზე და თითოეული ტიპის სამეწარმეო საზოგადოებას შეუძლია მისი გამოყენება რეგისტრაციის პროცესში.

რა შეიძლება მოწესრიგდეს განსხვავებულად ინდივიდუალური წესდებით?

ინდივიდუალური წესდების შემუშავება საშუალებას აძლევს მეწარმეს:

• კანონით დადგენილი წესისაგან განსხვავებულად მოაწესრიგონ პარტნიორებს შორის ურთიერთობები: მოგების განაწილების პრინციპები, პარტნიორთა გადაწყვეტილებების მიღების პროცედურები და საჭირო ხმათა ოდენობა,  საერთო კრების გადაწყვეტილებაუნარიანობა, ხმათა რაოდენობის გამოთვლის წესი, ახალი წილის უპირატესი შესყიდვის უფლების გათვალისწინება და ა.შ;
• მოქნილად დაარეგულირონ კომპანიის მართვის სტრუქტურა: განსაზღვრონ დირექტორთა უფლებამოსილებები დეტალურად, შესაძლებლობისას გაითვალისწინონ სამეთვალყურეო საბჭოს არსებობა საზოგადოებაში და მისი უფლებამოსილებები, განსაზღვრონ დამატებითი კონტროლის მექანიზმები კომპანიის ეფექტური ფუნქციონირებისათვის;
• ბიზნესის სპეციფიკიდან გამომდინარე, გაითვალისწინონ ისეთი ინდივიდუალური დებულებები, რომლებიც არ გვხვდება კანონში და, ამავდროულად, არ ეწინააღმდეგება მის შინაარსს. 

რა უპირატესობა აქვს ინდივიდუალურ წესდებას?

პარტნიორთა ინტერესებზე მაქსიმალურად მორგებული ინდივიდუალური წესდება ამცირებს მხარეებს შორის უთანხმოების რისკს, სადავოობისას არ ტოვებს ორაზროვან რეგულირებას, რაც ხელს უწყობს ნორმათა არახელსაყრელ ინტერპრეტაციას. გარდა ამისა, სრულყოფილი ინდივიდუალური წესდება იძლევა სტრატეგიულ უპირატესობას ინვესტორებთან ურთიერთობაში, ვინაიდან  ზრდის ნდობას და ამარტივებს მოლაპარაკებების პროცესს.

დასკვნის სახით შეიძლება ითქვას, რომ სტანდარტული წესდების გამოყენება ფორმალურად საკმარისია კომპანიის სამართლებრივი სტატუსის მისაღებად, თუმცა ის ვერ პასუხობს მრავალფეროვან საჭიროებებს ბიზნესისათვის, რომელსაც სურს ურთიერთობების ამომწურავად დარეგულირება და სამართლებრივი რისკების მინიმიზაცია. შესაბამისად, ინდივიდუალური წესდების შედგენა რჩება სტრატეგიულად მნიშვნელოვან ნაბიჯად. იგი წარმოადგენს არა მხოლოდ ტექნიკურ სადამფუძნებლო დოკუმენტს, არამედ - ეს არის სამართლებრივი არქიტექტურა, რომელიც იცავს თქვენი ბიზნესს და ქმნის კონკურენტულ უპირატესობას.